සටහන: සශිකලා මධුෂාණි
ජුනි 09; ලෝකය(අවුට්බවුන්ඩ් ටුඩේ): ඉතාලියේ සිසිලි දූපතෙන් පිටත් ව ගාසා තිරයට සහල් සහ ළදරු කිරිපිටි ඇතුළු සංකේතාත්මක ආධාර රැගෙන එමින් තිබු මැඩ්ලීන් නෞකාව ඊශ්‍රයල ආරක්ෂක අංශ යටතට පත්ව ඇති බව වාර්තා වේ.
මැඩ්ලීන් යාත්‍රාවේ මුහුදු ගමන අධීක්ෂණය කරන Madleen Tracker වෙබ් අඩවිය දක්වා ඇති පරිදි දේශගුණික ක්‍රියාකාරිනියක වන ග්‍රේටා තුන්බර්ග් ඇතුළු බ්‍රසීලය, ප්‍රංශය, ජර්මනිය, නෙදර්ලන්තය, ස්පාඤ්ඤය, ස්වීඩනය සහ තුර්කිය යන රටවල ක්‍රියාකාරීන් රැගත් යාත්‍රාව මේ වන විට මධ්‍යධරණී මුහුදේ ගාසා තීරය ආසන්නව දැකිය හැකි බව කියවේ.
ජීවිතාරක්ෂක කබා පැළඳ සිටින පුද්ගලයින් දෑත් ඉහළට ඔසවාගෙන වාඩි වී සිටින ආකාරය දැක්වෙන ඡායාරූපයක් මේ වන විට අන්තර්ජාලය තුළ සිඝ්‍රයෙන් ව්‍යාප්ත වෙමින් පවතින අතර ඊශ්‍රායල් නාවික අවහිරතා නොතකමින්, ගාසා තීරයට මානුෂීය ආධාර රැගෙන යාමට උත්සහ කරමින් තිබූ යාත්‍රාවකට ඊශ්‍රායල් හමුදා ගොඩ බැස ඇති බවත්, එහි මගීන් ඔවුන්ගේ මව් රටවලට ආපසු යැවීමට අපේක්ෂා කරන බවත් ඊශ්‍රායල් විදේශ අමාත්‍යාංශය නිවේදනය කර ඇත.
ඊශ්‍රායල් විදේශ අමාත්‍යාංශ මෙහිදී වැඩිදුරටත් සඳහන් කර තිබුණේ, ගාසාහි හමාස් සටන්කාමීන් වෙත අවි ආයුධ ළඟා වීම වැළැක්වීම සඳහා තම අවහිර කිරීම් අවශ්‍යවන බවයි.
