එක්සත් ජාතික පක්ෂයේ ප්‍රබලයකු වූ හිටපු අමාත්‍ය දයා ගමගේට අයත් බව කියන ව්‍යාපාරික ආයතන තුනක් ප්‍රසිද්ධියේ වෙන්දේසි කිරීමට කොළඹ වාණිජ මහාධිකරණය තීන්දු කර තිබේ.
ඒ අනුව 2025 ජුලි 03 වනදා මෙම වෙන්දේසිය සිදුකෙරෙන බවට කොළඹ වාණිජ මහාධිකරණයේ රෙජිස්ට්‍රාර්, නියෝජ්‍ය පිස්කල් විසින් පුවත්පත්වල ප්‍රසිද්ධ දැන්වීමක් පළකර ඇත.
මෙසේ මෙම ආයතන සතු දේපළ වෙන්දේසි කිරීමට තීන්දු කර ඇත්තේ පීපල්ස් ලීසිං ඇන්ඩ් ෆිනෑන්ස් සමාගමට අයවිය යුතු රුපියල් මිලියන 104 කට අධික මුදලක් (104,229,342) අයකර ගැනීම සඳහා ය.
2022 නොවැම්බර් 10 වනදා ලබාදුන් අධිකරණ නියෝගය අනුව දයා ගෲප් ලිමිටඩ්, දයා ඇපරල් එක්ස්පෝටර් (ප්‍රයිවට්) ලිමිටඩ්, ඔලිම්පස් කන්ස්ට්‍රක්ෂන් ප්‍රයිවට් ලිමිටඩ් යන ව්‍යාපාරික ආයතන මෙසේ ප්‍රසිද්ධ වෙන්දේසියේ විකිණීමට නියමිත බව සඳහන්.
