2025- 2026 අධ්‍යයන වර්ෂය සඳහා කොතලාවල ආරක්ෂක විද්‍යාලයේ වෛද්‍ය පීඨයට ඇතුළත් වීමට දේශීය සිසුන්ගෙන් අයදුම්පත් කැඳවා තිබේ.
MBBS උපාධිය සඳහා වසර 5ක පූර්ණ කාලීන පාඨමාලාව වෙනුවෙන් රුපියල් මිලියන 17.5 ක මුදලක් අයකෙරෙන බව කොතලාවල ආරක්ෂක විශ්වවිද්‍යාලය විසින් පළකර ඇති දැන්වීමෙහි දැක්වේ.
අ.පො.ස. උසස් පෙළ විභාගයෙන් එක් වරකදී ජීව විද්‍යා විෂයය ධාරවෙන් “සී” සාමාර්ථ දෙකක් සහ “එස්” සාමාර්ථයක් ලබාගෙන ඇති සිසු සිසුවියන්ට මේ සඳහා අයදුම් කළ හැකි බවත් එම දැන්වීමෙහි සඳහන්.
ආරක්ෂක නියෝජ්‍ය අමාත්‍ය විශ්‍රාමික මේජර් ජනරාල් අරුණ ජයසේකර පසුගිය මැයි 22 වනදා පාර්ලිමේන්තුවේදී විශේෂ ප්‍රකාශයක් කරමින් සඳහන් කර තිබුණේ මේ වසරේ සිට කොතලාවල වෛද්‍ය උපාධිය කැඩෙට් භටයින්ට සහ විදෙස් සිසුන්ට පමණක් සීමා කෙරෙන බවයි. මෙම ප්‍රකාශයට ආණ්ඩු පක්ෂයේ මන්ත්‍රීවරුන්ගෙන් ඉහළ ප්‍රතිචාරයක් හිමිව තිබුණේ වෛද්‍ය උපාධිය මුදලට විකිණීම නැවැත්වූ බව කියමිනි.
කෙසේවෙතත් ආණ්ඩු පක්ෂ මන්ත්‍රීවරුන් මහත් සේ වර්ණනා කළ එකී පියවර රිවස් කර ඇති බවක් කොතලාවල විශ්වවිද්‍යාලය පළකර ඇති දැන්වීමෙන් පෙන්නුම් කෙරේ.
