සටහන – රුවන් නෙළුගොල්ල
වත්මන් රජයේ මූල්‍ය විනය සම්බන්ධයෙන් ප්‍රශ්න කිරීමට විපක්ෂයට අයිතියක් නොමැති බව කර්මාන්ත හා ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ මහතා පවසයි.
ප්‍රශ්නය – රජය විසින් ආර්ථික කටයුතු නිසි ආකාරයෙන් පවත්වාගෙන යාමට සැලසුම් සකස් කරමින් සිටින මොහොතක විපක්ෂයෙන් යම් ප්‍රශ්න කිරීමක් සිදුවුණා මූල්‍ය විනයක් ඇතිවද රජය විසින් මේ කටයුතු සිදුකරන්නේ කියලා ?
“ඇත්තටම මම හිතන්නේ විපක්ෂයට එහෙම අහන්න අයිතියක් නෑ. ඔවුන්ට එහෙම අහන්න අයිතියක් නැතිවෙන්නේ ඔය කියන විපක්ෂය තමයි පහුගිය කාලේ මේ රට පාලනය කළේ. එතකොට රට පාලනය කරලා, රට බංකොලොත් වෙලා ඉවරයි. IMF ආයතනය පළවෙනි ඡේදයෙන්ම කියනවා මේ රට බංකොලොත් වෙන්න ප්‍රධාන හේතුව වංචාව සහ දූෂණය කියලා. එතකොට ඒ වගේ රිපෝට් කාඩ් එකක් ගත්ත විපක්ෂයකට අයිතියක් නෑ මූල්‍ය විනය ගැන මූලික වශයෙන් කතා කරන්න. අනික් කාරණය තමයි ඒ මූල්‍ය විනය අද දේශීය වශයෙන් පවත්වාගෙන යන එකක් පමණක් නොවෙයි ලෝක බැංකුවත්, IMF ආයතනයත් නිර්ණායක මත මාසිකව කරුණුමය වශයෙන් විශ්ලේෂණය වෙමින් යන එකක්. ඒ නිසා මූල්‍ය විනයක් නෑ කියන්න බෑ අද. රජයේ ආදායම් වැඩිවීම පිළිබඳව ඉතා හොඳ දත්ත ප්‍රමාණයක් අපට ලැබිල තියෙනවා. රජයේ අනවශ්‍ය වියදම අඩුවීම පිළිබඳ දත්ත තියෙනවා. ඵලදායි ආයෝජනවල පමණක් රජය ආයෝජනය කරන බවට වෙනදට වඩා හොඳ සහතිකයක් තියෙනවා. ඒ වගේම රාජ්‍යතාන්ත්‍රිකයේ සහ රාජ්‍යකරණයේ භාවිත කරන සම්පත් ප්‍රමාණය ඉතා තීව්‍ර ලෙස අවම වෙලා තියෙනවා. සාපේක්ෂව බලන මධ්‍යස්ථ පුද්ගලයකුට මේ පිළිබඳ ගැටලුවක් එන්නේ නෑ. නමුත් මේ ක්‍රමය වෙනස්වීම පිළිබඳ වේදනාවට ලක්වෙලා තියෙන විපක්ෂයට ගැටලුවක් විය හැකියි”
නියෝජ්‍ය අමාත්‍ය චතුරංග අබේසිංහ මහතා මේ බව පවසා ඇත්තේ දිනමිණ පුවත්පත සමග සම්මුඛ සාකච්ඡාවකට එක්වෙමිනි.
