ජනාධිපතිවරයාගේ ඉල්ලා අස්වීමේ ලිපිය තවමත් තමාවෙත ලැබී නොමැති බව කතානායක මහින්ද යාපා අබේවර්ධන මහතා පවසනවා. අද දහවල් වනවිට ජනාධිපතිවරයා සිය ඉල්ලා අස්වීමේ ලිපිය කතානායකවරයා වෙත ලබාදෙනු ඇති බවයි වාර්තා වී තිබුණේ.
එල්ල වූ ජනතා විරෝධය හමුවේ පසුගිය 09 වැනිදා ජනාධිපති මන්දිරයෙන් පළාගොස් ආරක්ෂිත ස්ථානයක සැඟව සිටි ජනාධිපතිවරයා කතානායකවරයා වෙත දැනුම් දී තිබුණේ 13 වැනිදා ධුරයෙන් ඉල්ලා අස්වීමට තමා සූදානම් බවයි.
කෙසේ නමුත් අරගලයේ නායකයන්, දේශපාලන පක්ෂ නායකයන් බහුතරයක් ප්‍රකාශ කළේ දැඩි ජනතා විරෝධයක් එල්ල වෙද්දී තනතුරෙන් ඉල්ලා අස්වීමට ජනාධිපතිවරයාට නැකැත් බැලීමට දින ගැනීමට අවශ්‍ය නොවන බවයි. සැඟවී සිටිමින් ධුරය ආරක්ෂා කර ගැනීම සඳහා කුමන හෝ කුමන්ත්‍රණයක් සිදු කිරීමට උත්සාහ දරමින් සිටින බවට ඔවුන් අනතුරු අඟවා තිබිණි.
මේ නිසා අරගලකරුවන් තවදුරටත් සිය අරගලය අඛණ්ඩව සිදු කිරීමට තීරණය කළ අතර ජනාධිපතිවරයාගේ ඉල්ලා අස්වීම නිළ වශයෙන් ප්‍රකාශයට පත්වන තෙක් අරගලය අඛණ්ඩව ක්‍රියාත්මක බව අරගලකරුවන් ප්‍රකාශ කර තිබිණි. ඒ අනුව ඔවුන් තවමත් ජනාධිපති ලේකම් කාර්යාලය, ජනාධිපති මන්දිරය, අරලියගහ මන්දිරය සිය අණසක යටතේ තබාගෙන සිටී.
UN
