රෂිකා හෙන්නායක අගෝස්තු 02 , කොළඹ LNW :
නෝර්වුඩ් ප්‍රාදේශීය ලේකම් කාර්යාලයේ අස්වැසුම සුභසාධක ප්‍රතිලාභ මුදල් රුපියල් ලක්ෂ 30කට ආසන්න ප්‍රමාණයක් වංචා කිරීමේ සිද්ධියක් සම්බන්ධයෙන් නිලධාරිනියන් දෙදෙනෙකු අත්අඩංගුවට ගෙන රක්ෂිත බන්ධනාගාර ගත කර ඇත.
විමර්ශනවලට අනුව, මෙම සැකකාරිනියන් ප්‍රතිලාභීන්ට හිමි මුදල් ඔවුන්ගේ ඥාතීන්ගේ සහ හිතවතුන්ගේ බැංකු ගිණුම්වලට බැර කරමින් මෙම මූල්‍ය වංචාව සිදු කර තිබේ.
සිද්ධිය සම්බන්ධයෙන් තවත් නිලධාරීන් තිදෙනෙකුගේ වැඩ තහනම් කර ඇති අතර, වංචාව පිළිබඳව සොයා බැලීමට මුදල් අමාත්‍යාංශය සහ දිස්ත්‍රික් ලේකම් කාර්යාලය එක්ව විශේෂ විගණනයක් ආරම්භ කර ඇත.
මුදල් නොලැබීම ගැන ප්‍රශ්න කළ ප්‍රතිලාභීන්ට මෙම නිලධාරීන් තර්ජනය කර ඇති බවද අනාවරණය වී තිබේ.
නුවරඑළිය දිස්ත්‍රික්කයේ සෙසු ප්‍රාදේශීය ලේකම් කාර්යාලවලද මෙවැනි වංචා සිදුව ඇත්දැයි සොයා බැලීමට පුළුල් පරීක්ෂණයක් පැවැත්වීමට බලධාරීන් තීරණය කර ඇත.
