සටහන : සශිකලා මධුෂාණී
ලෝකය(අවුට්බවුන්ඩ් ටුඩේ) අගෝස්තු 30දින : ඉක්වදෝරයේ හිටපු ජනාධිපති ලෙනින් මොරෙනෝට දූෂණ නඩුවක් සම්බන්ධයෙන් වසර 5ක සිරදඬුවමක් නියම කර තිබේ.
73 හැවිරිදි මොරෙනෝට එරෙහි නඩුව සම්බන්ධ වී ඇත්තේ චීනයේ Sinohydro සමාගම ඉදිකළ ඉක්වදෝරයේ විශාලතම ජල විදුලි බලාගාරය වන Coca Codo Sinclair ව්‍යාපෘතියටයි. අල්ලස් ලබාගෙන එම සමාගමට ව්‍යාපෘතිය ලබාගැනීමට බලපෑම් කළ බවට අධිකරණය ඔහු වරදකරු කර ඇත.
නඩු විභාගයේදී මොරෙනෝ වරද ප්‍රතික්ෂේප කරමින් තමන් Sinohydro සමාගමෙන් කිසිදු මුදලක් ලබාගෙන නොමැති බව ප්‍රකාශ කර ඇති අතර, තීන්දුවට එරෙහිව අභියාචනය කිරීමටද ඔහු සැලසුම් කර ඇත.
අධිකරණය ඔහුට අනාගතයේදී කිසිදු රාජ්‍ය තනතුරක් දැරීම සදහටම තහනම් කර ඇති අතර මෙම නඩුවේදී මොරෙනෝගේ බිරිඳ සහ පවුලේ තවත් සාමාජිකයන් කිහිපදෙනෙකුටද සිරදඬුවම් නියම කර තිබේ.
