රෂිකා හෙන්නායක අගෝස්තු 30 , කොළඹ LNW :
ඊයේ (29) පස්වරුවේදී, අනුරාධපුර පූජා භූමි සංවර්ධන සැලැස්ම ක්‍රියාවට නැංවීම පිළිබඳ සොයා බැලීමේ සාකච්ඡාවකට ජනාධිපති අනුර කුමාර දිසානායක මහතා අනුරාධපුර දිස්ත්‍රික් ලේකම් කාර්යාලයේදී එක්විය.
එහිදී, ඉන්දීය රජයේද යුනෙස්කෝ සංවිධානයේද සහාය ඇතිව ක්‍රියාත්මක ව්‍යාපෘති සමාලෝචනය කර, නව යෝජනාද ඇතුළත් කර අදාළ සැලැස්ම ලබන මස 8වනදා අනුරාධපුර පූජා භූමි සංවර්ධන කමිටුවට ඉදිරිපත් කර 15 වනදා වන විට ව්‍යාපෘතියේ සම්පූර්ණ සවිස්තරාත්මක සැලැස්ම සකස් කර අවසන් කරන ලෙසද උපදෙස් දී තිබේ.
අනුරාධපුර පූජා භූමියේ ඇති පුරාවිද්‍යාත්මක ස්ථාන හුදෙක් මිනිසුන් අත්හැර ගිය “නටබුන්” ලෙස පමණක් නොසලකා, ඒවා අදටත් ජනතාව වන්දනාමාන කරන “සජීවී ඓතිහාසික ස්ථාන” ලෙස සලකා බැතිමතුන් සඳහා අවශ්‍ය පහසුකම් සැලසීමේ අවශ්‍යතාවත්, හරිත සංවේදී කලාපයක් ලෙස වාහන තදබදය අවම කිරීමත් විද්‍යුත් බස් රථ සේවා යොදා ගැනීම පිළිබඳ සැලසුම් කිරීමේ වැදගත්කමත් මෙහිදී වැඩිදුරටත් අවධාරණය කළ බව පැවසේ.
