රෂිකා හෙන්නායක සැප්තැම්බර් 28, කොළඹ LNW :
ශ්රී ලංකාවේ මලල ක්රීඩා ඉතිහාසයේ සුවිශේෂී සන්ධිස්ථානයක් සටහන් කරමින්, 2026 ආසියානු ක්රීඩා උළෙලේ පිරිමි හෙල්ල විසි කිරීම (Javelin Throw) ඉසව්වෙන් රන් පදක්කම දිනා ගැනීමට රුමේෂ් තරංග සමත් විය. ඒ, ආසියානු ක්රීඩා උළෙලක හෙල්ල විසි කිරීමේ ඉසව්වෙන් රන් පදක්කමක් දිනූ පළමු ශ්රී ලංකා ක්රීඩකයා ලෙස ඉතිහාසයට එක්වෙමිනි.
ජපානයේ අයිචි – නගෝයා හිදී පැවති මෙම තරගාවලියට ලෝකයේ පෙරමුණේ සිටින හෙල්ල විසි කිරීමේ ක්රීඩකයා ලෙස පිවිසි රුමේෂ්, සමස්ත ජාතියේම අපේක්ෂාවන් මල්පල ගන්වමින් විශිෂ්ඨ දස්කම් දැක්වීය. තමා සහභාගී වූ මෙම තරග වාරය මෙතෙක් ඔහුගේ ක්රීඩා දිවියේ විශිෂ්ඨතම කාලසීමාව බවට පත් කරමින්, ඔහු තවත් ජාත්යන්තර කිරුළක් මෙලෙස ශ්රී ලංකාවට දිනා දුන්නේය.
පාකිස්තානයේ වත්මන් ඔලිම්පික් ශූර අර්ෂද් නදීම් සහ ආසියාවේ දක්ෂතම ක්රීඩකයන් රැසක් ඇතුළත් ලෝක මට්ටමේ ප්රබල ක්රීඩකයන් පිරිසක් සමඟ තරග වැදුණු රුමේෂ්, මීටර් 88.55 ක දක්ෂතාවක් දක්වමින් රන් පදක්කම තහවුරු කර ගත්තේය.
මෙම ජයග්රහණය ශ්රී ලංකා මලල ක්රීඩා ඉතිහාසයේ සුවිශේෂී හැරවුම් ලක්ෂයකි. දශක ගණනාවක් පුරා ආසියානු ක්රීඩා උළෙලේදී ශ්රී ලංකාව අමතක නොවන ජයග්රහණ අත්කර ගෙන තිබුණද, මීට පෙර කිසිදු ශ්රී ලංකිකයෙකු පිරිමි හෙල්ල විසි කිරීමේ ඉසව්වේ ප්රථම ස්ථානය දිනා තිබුණේ නැත. අද දින රුමේෂ් එම වාර්තාව අලුත් කරමින්, රටේ ක්රීඩා ඉතිහාසයේ අමතක නොවන ස්වර්ණමය මොහොතක් නිර්මාණය කළේය.
