රෂිකා හෙන්නායක ඔක්තෝබර් 20, කොළඹ LNW :
අල්ලස් කොමිෂන් සභාව මගින් අත්අඩංගුවට ගනු ලැබූ, හිටපු නියෝජ්‍ය අමාත්‍ය සරණ ගුණවර්ධන මහතාගේ බිරිඳ ඇතුළු පුද්ගලයින් දෙදෙනෙකු මෙම මස 30 වැනිදා දක්වා තවදුරටත් රිමාන්ඩ් භාරයේ තැබීමට කොළඹ ප්‍රධාන මහෙස්ත්‍රාත් අසංග එස්. බෝදරගම මහතා අද(20) නියෝග කළේය.
සරණ ගුණවර්ධන මහතාට අත්හිටවූ සිර දඬුවමක් ලබා දෙන ලෙස විනිසුරුවරයෙකුට බලපෑම් කිරීමේ අරමුණින්, කොළඹ මහාධිකරණයේ කාර්යාල සහායකයෙකුට අල්ලසක් ලබා දීමට උත්සාහ කළ බව කියන සිද්ධියකට අදාළව මෙම පියවර ගෙන ඇත.
මෙම නඩුවේ තුන්වන සැකකරු වන මිනුවන්ගොඩ මහෙස්ත්‍රාත් අධිකරණයේ රෙජිස්ට්‍රාර්වරයා, රුපියල් ලක්ෂ 10 බැගින් වූ පුද්ගල ඇපකර දෙකක් මත මුදා හැරීමට ද මහෙස්ත්‍රාත්වරයා නියෝග කළේය. අල්ලස් කොමිෂන් සභාව විසින් සැකකරුවන් තිදෙනා අධිකරණය හමුවට ඉදිරිපත් කර කරුණු දැක්වීමෙන් අනතුරුව මෙම නියෝගය නිකුත් කෙරිණි. මීට පෙර, පසුගිය 6 වැනිදා කොළඹ ප්‍රධාන මහෙස්ත්‍රාත් අධිකරණය විසින් සරණ ගුණවර්ධන මහතාගේ බිරිඳ ඇතුළු සැකකරුවන් තිදෙනා ඔක්තෝබර් 20 වැනිදා දක්වා රිමාන්ඩ් භාරයේ තැබීමට නියෝග කර තිබුණි.
