සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 20 : යේමනයේ ක්‍රියාත්මක හූති සන්නද්ධ කණ්ඩායමෙන් එල්ල විය හැකි මිසයිල සහ ඩ්‍රෝන ප්‍රහාරවලින් ආරක්ෂා වීම සඳහා සෞදි අරාබිය ප්‍රහාරක ජෙට් යානා සහාය ලබාදීමට බ්‍රිතාන්‍ය රජය සූදානම් බව වාර්තා වේ.
මෙම ආරක්ෂක මෙහෙයුම සඳහා බ්‍රිතාන්‍ය රාජකීය ගුවන් හමුදාවට අයත් Eurofighter Typhoon ප්‍රහාරක ජෙට් යානා යොදා ගැනීමට නියමිත බව වාර්තාවන අතර එම යානා මඟින් සතුරු ගුවන් තර්ජන හඳුනාගැනීම සහ අවශ්‍ය අවස්ථාවලදී ඒවාට ප්‍රතිචාර දැක්වීම සිදු කළ හැකිය.
මීට අමතරව, බ්‍රිතාන්‍ය හමුදා ප්‍රවාහන ගුවන් යානා සහ හමුදා උපදේශකවරුන්ගේ සහාය ද මෙහෙයුමට ලබාදීමට සැලසුම් කර ඇති බව කියැවේ.
බ්‍රිතාන්‍යයේ මෙම පියවර මඟින් මැදපෙරදිග කලාපයේ ආරක්ෂක තත්ත්වය පිළිබඳව නැවතත් ජාත්‍යන්තර අවධානය යොමුව තිබේ. මෙම තත්ත්වය කලාපීය ආරක්ෂාවට මෙන්ම බලශක්ති සැපයුමට සහ ජාත්‍යන්තර වෙළෙඳාමට ද බලපෑම් ඇති කළ හැකි බව විශ්ලේෂකයන් පෙන්වා දී ඇත.
