සටහන: සශිකලා මධුෂාණී
ලෝකය(අවුට්බවුන්ඩ් ටුඩේ) ඔක්තෝම්බර් මස 25: බ්‍රසීල ජනාධිපතිවරණයේ තීරණාත්මක දෙවැනි වටයේ ඡන්ද විමසීම අද (25) පැවැත්වේ. වත්මන් ජනාධිපති ලුයිස් ඉනාසියෝ ලූලා ද සිල්වා සහ විපක්ෂ අපේක්ෂක සෙනෙට් සභික ෆ්ලාවියෝ බොල්සොනාරෝ අතර පැවැත්වෙන මෙම තරගය පිළිබඳ ජාත්‍යන්තර අවධානය යොමුව තිබේ.
ඔක්තෝබර් 4 වැනිදා පැවති පළමු වටයේ ඡන්ද විමසීමේදී ෆ්ලාවියෝ බොල්සොනාරෝ සියයට 47ක පමණ ඡන්ද ප්‍රතිශතයක් ලබා ගත් අතර, ලූලා ද සිල්වාට හිමිවූයේ සියයට 45ක පමණ ප්‍රතිශතයකි. කිසිදු අපේක්ෂකයකු වලංගු ඡන්දවලින් සියයට 50 ඉක්මවා ලබා නොගැනීම හේතුවෙන් දෙවැනි වටයක් පැවැත්වීමට සිදුවිය.
මෙවර ඡන්ද විමසීම සඳහා බ්‍රසීලයේ මිලියන 159කට ආසන්න ජනතාවක් සුදුසුකම් ලබා සිටිති. එරට ඡන්දය ප්‍රකාශ කිරීම සඳහා ඉලෙක්ට්‍රොනික ඡන්ද යන්ත්‍ර භාවිත කරන අතර, ඡන්ද විමසීම අවසන් වීමෙන් පැය කිහිපයක් ඇතුළත ප්‍රතිඵල ප්‍රකාශයට පත් කිරීමට සාමාන්‍යයෙන් හැකියාව පවතී.
මැතිවරණයට පෙර අවසන් ප්‍රචාරක දිනය වූ ඔක්තෝබර් 24 වැනිදා වත්මන් ජනාධිපති ලූලා ද සිල්වාට සහාය පළ කරමින් දහස් ගණනක ජනතාවක් රියෝ ද ජැනයිරෝ නුවර සුප්‍රසිද්ධ කොපාකබානා වෙරළ තීරයට රැස්ව තිබූ අතර රතු පැහැති ඇඳුම්වලින් සැරසුණු ආධාරකරුවන් බ්‍රසීල ධජ රැගෙන පෙළපාළිවලට සහභාගී වූ අතර, ලූලා සිය ආධාරකරුවන් අමතමින් අවසන් මැතිවරණ ප්‍රචාරක කටයුතු සිදු කළේය.
මේ අතර, ෆ්ලාවියෝ බොල්සොනාරෝගේ ආධාරකරුවෝ ද රියෝ ද ජැනයිරෝ සහ මිනාස් ජෙරායිස් ප්‍රාන්තයේ බෙලෝ හොරිසොන්ටේ ඇතුළු ප්‍රදේශවල රැස්වී සිය අපේක්ෂකයාට සහාය පළ කළ අතර විදෙස් මාධ්‍ය වාර්තා පෙන්වා දෙන්නේ දෙපාර්ශ්වයම අවසන් මොහොතේ ඡන්දදායකයන්ගේ සහාය ලබා ගැනීමට දැඩි උත්සාහයක නිරත වූ බවයි.
මෙවර මැතිවරණ ව්‍යාපාරයේදී සමාජ සුබසාධනය, දරිද්‍රතාව අඩු කිරීම, ආර්ථික ප්‍රතිපත්ති සහ ප්‍රජාතන්ත්‍රවාදී ආයතන ආරක්ෂා කිරීම සම්බන්ධයෙන් ලූලාගේ පාර්ශ්වය අවධානය යොමු කර ඇති අතර අනෙක් පසින් ෆ්ලාවියෝ බොල්සොනාරෝ සිය ප්‍රචාරක කටයුතුවලදී අපරාධ මර්දනය, මහජන ආරක්ෂාව සහ රාජ්‍ය වියදම් සීමා කිරීම වැනි කරුණු ඉදිරිපත් කර ඇත.
ෆ්ලාවියෝ බොල්සොනාරෝ යනු 2019 සිට 2022 දක්වා බ්‍රසීලයේ ජනාධිපති ධුරය දැරූ ජයිර් බොල්සොනාරෝගේ පුත්‍රයාය. ඔහුගේ දේශපාලන පාර්ශ්වය සහ ලූලාගේ පාර්ශ්වය අතර පවතින ප්‍රතිපත්තිමය වෙනස්කම් ද මෙවර මැතිවරණයේ ප්‍රධාන අවධානයට ලක්ව තිබේ.
ලතින් ඇමරිකාවේ විශාලතම ආර්ථිකය හිමි බ්‍රසීලයේ ජනාධිපතිවරණ ප්‍රතිඵලය එරට අනාගත ආර්ථික හා සමාජ ප්‍රතිපත්තිවලට පමණක් නොව ජාත්‍යන්තර සබඳතාවලට ද බලපෑම් ඇති කළ හැකි බව විශ්ලේෂකයෝ පෙන්වා දී තිබේ.
