රෂිකා හෙන්නායක නොවැම්බර් 06, කොළඹ LNW:
ගම්පහ මහේස්ත්‍රාත් බන්දුල ගුණරත්න මහතා වහාම ක්‍රියාත්මක වන පරිදි විනිසුරුවන් පුහුණු කිරීමේ ආයතනය වෙත ස්ථාන මාරු කර ඇති බව අනාවරණය වේ.
ගම්පහ පොලිසිය විසින් අසත්‍ය චෝදනා මත එකම පුද්ගලයෙකුට එරෙහිව නඩු දෙකක් පැවරීම සම්බන්ධයෙන් මතු වූ ගැටළුවක් මුල් කරගනිමින් මෙම සිදුවීම් මාලාව හටගෙන තිබේ.
එහිදී අහිංසක පුරවැසියන්ට එරෙහිව නිකරුණේ නඩු නොපවරන ලෙසත්, ඒ සඳහා චක්‍රලේඛයක් නිකුත් කරන ලෙසත් මහේස්ත්‍රාත්වරයා විසින් පොලිස්පතිවරයාට නියෝග කරනු ලැබීය.
කෙසේ වෙතත්, එම නියෝගය නොතැකීම නිසා පොලිස්පතිවරයා අධිකරණයට අපහාස කර ඇති බවට සඳහන් කරමින් මහේස්ත්‍රාත්වරයා විසින් අභියාචනාධිකරණයට පැමිණිල්ලක් ගොනු කිරීම මෙම ස්ථාන මාරුවට සෘජුවම හේතු වී ඇති බව පැවසේ.
මේ සම්බන්ධයෙන් පොලිස්පතිවරයා විසින් අධිකරණ සේවා කොමිෂන් සභාවට ඉදිරිපත් කළ පැමිණිල්ලක් මත පදනම්ව, කොමිෂන් සභාවේ ලේකම්වරයා විසින් අදාළ ස්ථාන මාරුවීමේ ලිපිය නිකුත් කර ඇත.
