සටහන – පුලී
නොවැම්බර් 09, LNW (කොළඹ): එංගලන්තයේ සහ වේල්සයේ නැගෙනහිර ප්‍රදේශ රැසකට බලපා ඇති ඝන මීදුම් තත්ත්වය හේතුවෙන් බ්‍රිතාන්‍ය කාලගුණ විද්‍යා දෙපාර්තමේන්තුව (Met Office) විසින් කහ මට්ටමේ කාලගුණ අනතුරු ඇඟවීමක් නිකුත් කර තිබේ.
මෙම අනතුරු ඇඟවීම සඳුදා පෙරවරු 11.00 දක්වා ක්‍රියාත්මක වන අතර, උතුරු අයර්ලන්තය සඳහාද වෙනම කහ මට්ටමේ මීදුම් අනතුරු ඇඟවීමක් නිකුත් කර ඇත. එය සඳුදා පෙරවරු 10.00 දක්වා බලපැවැත්වීමට නියමිතය.
එංගලන්තය සහ වේල්සය ආවරණය වන ප්‍රධාන අනතුරු ඇඟවීමේ කලාපය දකුණු බ්‍රිතාන්‍යයේ ප්‍රදේශ රැසක් පුරා විහිදී තිබේ. කැන්ටර්බරි සිට කාඩිෆ් දක්වාත්, හල් සිට ශාන්ත අසාෆ් දක්වාත්, සවුත්හැම්ප්ටන් සිට යෝර්ක් දක්වාත් විහිදෙන මෙම කලාපයට ලන්ඩන්, බර්මින්හැම් සහ ග්‍රේටර් මැන්චෙස්ටර්හි ඇතැම් ප්‍රදේශද ඇතුළත් වේ.
කාලගුණ බලධාරීන් පෙන්වා දෙන්නේ ඇතැම් ප්‍රදේශවල දෘශ්‍යතාව මීටර් 50ටත් වඩා අඩු විය හැකි බවයි. එම තත්ත්වය හේතුවෙන් මාර්ගවල රිය පැදවීම දැඩි අවදානම් සහගත විය හැකි අතර රිය අනතුරු සිදුවීමේ අවදානමද ඉහළ යා හැකිය.
මීදුම් තත්ත්වය හේතුවෙන් බස් රථ, දුම්රිය, තොටුපළ සහ ගුවන් ගමන් සේවාවලටද බලපෑම් එල්ල විය හැකි බවට අනතුරු අඟවා තිබේ. ඇතැම් ප්‍රවාහන සේවා ප්‍රමාද වීමට හෝ අවලංගු කිරීමට සිදුවිය හැකි බැවින් මගීන්ට තම ගමන් සැලසුම් සම්බන්ධයෙන් අවධානයෙන් සිටින ලෙසද දැනුම් දී ඇත.
සඳුදා උදෑසන කාලය ගතවීමත් සමඟ මීදුම් තත්ත්වය ක්‍රමයෙන් පහව යනු ඇතැයි අපේක්ෂා කෙරේ. කෙසේ වෙතත්, ඇතැම් ප්‍රදේශවල මීදුම් තත්ත්වය දහවල් කාලය දක්වා පැවතිය හැකි බවද කාලගුණ අනාවැකිවල සඳහන් වේ.
මේ අතර, බ්‍රිතාන්‍යයේ බොහෝ ප්‍රදේශවලට සීතල උදෑසනක අත්දැකීමක් ලැබී ඇති අතර උෂ්ණත්වය සෙල්සියස් අංශක කිහිපයක් දක්වා පහත වැටී තිබේ. ප්‍රදේශ රැසක පොළොව මත තුහින ඇතිවීමේ හැකියාවද පවතින බව වාර්තා වේ.
