හිටපු මුදල් අමාත්‍ය රවී කරුණානායක මහතා තමන්ට එරෙහිව එල්ල කළ චෝදනා තමන්ට අසන්නට නොලැබුණු බවත් ඒ ගැන තමන් ද සොයාබැලීමට බලාපොරොත්තු වන බවත් හිටපු ජනාධිපති මෛත්‍රීපාල සිරිසේන මහතා පවසයි.
ප්‍රශ්නය – හිටපු මුදල් ඇමතිතුමා ඊයේ ඔබතුමාව දැඩි විවේචනයකට ලක් කළා ?
“කවුද ?”
ප්‍රශ්නය – රවී කරුණානායක මහතා ….
“මොකක්ද ? මම දන්නෙ නැහැ …”
ප්‍රශ්නය – ඔබතුමාගෙ ෆයිල් වගයක් තියෙනවාලු එතුමා ගාව ?
“මං අහගෙන හිටියෙ නෑ. මම ඊයෙ රෑ වෙලා ආවෙ රත්නපුරේ ඉඳලා. මාත් බලන්න ඕනෙ හොයලා මොනවද කියලා …”
ප්‍රශ්නය – ඉදිරියේදී ඔබතුමාගෙ සියලුම තොරතුරු හෙළිකරනවා කියලා කියනවා ?
“මේ දේශපාලන ලෝකයේ හරි අර්බුද නෙ ඉතින්. හරි ව්‍යාකූලයි. ඉතින් ඕවා සාමාන්‍ය දේවල්. ඕවා ප්‍රශ්න නෙවෙයි. ඕවා අපි එච්චර ගණං ගන්නෙ නෑ ….”
ප්‍රශ්නය – හිටපු මුදල් ඇමතිතුමානෙ මේ කියන්නෙ ?
“හරි, හරි, හරි … ඕනෙ කෙනෙක් කියපුවාවෙ …. ඕනෙ කෙනෙක් කියපුවාවෙ …”
හිටපු ජනාධිපතිවරයා මේ බව පැවසුවේ ඊයේ (12) පැවති ශ්‍රීලනිප රැස්වීමකින් අනතුරුව මාධ්‍යවේදීන් නැඟූ ප්‍රශ්න කිහිපයකට පිළිතුරු ලබාදෙමිනි.
හිටපු මුදල් අමාත්‍ය රවී කරුණානායක මහතා පෙරේදා දිනයේදී මෛත්‍රීපාල සිරිසේන මහතා සම්බන්ධයෙන් දැඩි විවේචනාත්මක ප්‍රකාශයක් සිදුකළ අතර මූල්‍ය අක්‍රමිකතා ඇතුළු චෝදනා ගණනාවක් ද එල්ල කළේය. ඒවා සම්බන්ධයෙන් තමන් සතුව සාක්ෂි පවතින බවත් පැවසූ කරුණානායක මහතා ඒ පිළිබඳ ප්‍රසිද්ධ විවාදයකට පැමිණෙන ලෙස මෛත්‍රීපාල සිරිසේන මහතාට අභියෝගයක් ද එල්ල කළේය.
RN
