ආර්ථික ඝාතකයන් සොයන ජනාධිපති රනිල්

මෙරට ආර්ථික විනාශයට වගකිව යුතු නිලධාරීන් සහ දේශපාලනඥයන් සම්බන්ධයෙන් විමර්ශනය කිරීමට පාර්ලිමේන්තු තේරීම් කාරක සභාවක් පත් කිරීමට ජනාධිපති රනිල් වික්‍රමසිංහ මහතා පාර්ලිමේන්තුවේ දී සිය කැමැත්ත ප්‍රකාශ කළේය.

ඒ සඳහා විශේෂ ජනාධිපති කොමිෂන් සභාවක් ද පත් කළ හැකි නමුත් පාර්ලිමේන්තු තේරීම් කාරක සභාවක් පත් කිරීම සුදුසු යැයි ජනාධිපතිවරයා පැවසීය.

විපක්ෂ මන්ත්‍රී කබීර් හෂීම් මහතා (සජබ) විසින් ඒ සම්බන්ධයෙන් කරන ලද කරුණු පැහැදිලි කිරීමකට සහ ඉල්ලීමට එකඟ වෙමින් ජනධිපතිවරයා ඒ සඳහා කැමැත්ත ප්‍රකාශ කළේය. ඒ සම්බන්ධයෙන් තමනට කිසිවක් සැඟවීමට අවශ්‍ය නොවන බවත් හිටපු ජනාධිපතිවරයා ද අනුමැතිය පළ කරන ලද බදු සහන යෝජනා සම්බන්ධයෙන් ද සොයා බැලීම සුදුසු බවත් එහිදී ජනාධිපතිවරයා කියා සිටියේය.

රෂිකා හෙන්නායක