පසුගිය කාලවකවානුවේ ශ්‍රී ලංකාව දේශපාලනික සහ ආර්ථිකමය ලෙස මුහුණපෑ අර්බුදකාරී තත්ත්වයන් හමුවේ පසු බෑමට ලක් වූ සංචාරක ක්ෂේත්‍රය වර්තමානයේ යථා තත්ත්වයට පත්වෙමින් තිබේ.
ප්‍රධාන වශයෙන්ම සංචාරක අංශය යනු දිවයිනේ තුන්වන විශාලතම විදේශ විනිමය මූලාශ්‍රය වෙමින් ආර්ථිකයේ සැලකිය යුතු කාර්යභාරයක් ඉටු කරන දළ දේශීය නිෂ්පාදිතයෙන් සියයට 12 ක පමණ වපසරියක් දරන කර්මාන්තයක් වේ.
ඒ ශ්‍රී ලංකා ආර්ථිකයට සෘජු හා වක්‍ර රැකියා දහස් ගණනක් එක් කරමින් සංචාරක ව්‍යාපාරය රැකියා අවස්ථා විශාල ප්‍රමාණයක් නිර්මාණය කරන බැවිනි.
සංචාරක අමාත්‍යාංශයේ ආරංචි මාර්ග අනාවරණය කරන පරිදි වත්මන් පාලනය හමුවේ සංචාරක කර්මාන්තයෙන් ඇමෙරිකානු ඩොලර් බිලියනයකට අධික විදේශ විනිමයක් රට උපයාගෙන ඇත.
ඒ අනුව මෙම වසරේ දෙසැම්බර් වන විට ශ්‍රී ලංකාව දළ වශයෙන් ඩොලර් බිලියන 1.7 ක විදේශ විනිමයක් උපයා ගනු ඇතැයි අමාත්‍යාංශය බලාපොරොත්තු වෙයි.
එම බලාපොරොත්තුවට නවමු අරුතක් එක් කරමින් මේ වසරේ සංචාරක ගමනාගමන ඉලක්කය ලක්ෂ 8ට ආසන්නව පළමු සති දෙක තුළ ශ්‍රී ලංකාවට පැමිණි සංචාරකයින් සංඛ්‍යාව 30,000 සීමාව පසුකරමින් මෙරටට පැමිණෙන මුළු ජාත්‍යන්තර නරඹන්නන් සංඛ්‍යාව 658,210 දක්වා ඉහළ ගොස් තිබේ.
ජාත්‍යන්තර අමුත්තන් ලක්ෂ 8ක් ගෙන්වා ගැනීමේ ඉලක්කයක් ඇතිව වසර අවසන් කිරීමට ශ්‍රී ලංකාව දැන් අපේක්ෂා කරයි.
ඒ අනුව ඉලක්කය සාක්ෂාත් කර ගැනීමට නම් ඉදිරි සති දෙක තුළ ගමනාන්තයට අවම වශයෙන් සංචාරකයින් 141,790 ක් ආකර්ෂණය කර ගත යුතුයි. ශ්‍රී ලංකා සංචාරක සංවර්ධන අධිකාරිය විසින් නිකුත් කරන ලද තාවකාලික දත්ත වලට අනුව දෙසැම්බර් 01 සිට 13 දක්වා කාලය තුළ දිවයිනේ සංචාරකයින් 30,193 ක් පිළිගෙන ඇත.
දෙසැම්බර් මාසය සඳහා මේ දක්වා දෛනික පැමිණීමේ සාමාන්‍යය 2,322 කි. සතිපතා විශ්ලේෂණවලින් පෙනී යන්නේ දෙසැම්බර් පළමු සතිය සඳහා (01-07) සංචාරකයින් 16,169 ක් මෙරටට ඇතුළු වූ අතර දෙවන සතිය තුළ (08-13) මේ දක්වා අමුත්තන් 14,024 ක් පිළිගෙන ඇති බවයි.
විශේෂයෙන්ම දෙසැම්බර් මාසය සඳහා මෙතෙක් විශාලතම සංචාරක රථවාහන උත්පාදක දොරටුව රුසියානු සමූහාණ්ඩුව වන අතර එය මුළු සංචාරක පැමිණීම්වලින් සියයට 21 ක් මෙරටට ගෙන එයි.
දෙවන ස්ථානය ඉන්දියාවට හිමි වන අතර එය මුළු සංචාරක පැමිණීමෙන් සියයට 18 ක් වේ. එමෙන්ම තුන්වන ස්ථානය එක්සත් රාජධානිය වන අතර, සමස්ත සංචාරක ගමනාගමනයෙන් සියයට 9 කට එය දායක වේ. අනෙකුත් කැපී පෙනෙන වෙළඳපල අතර ඕස්ට්‍රේලියාව, ජර්මනිය සහ එක්සත් ජනපදය ඇතුළත් වේ.
මෙලෙස වර්තමානය වන විට සංචාරකයින්ගේ පැමිණිමේ ඉහළ යාමක් පෙන්නුම් කිරීම හේතුවෙන් ශ්‍රී ලංකාව මුහුණපාමින් සිටින පසුබැසීම යථා තත්ත්වයට පත් වීම කෙරෙහි ශ්‍රී ලාංකිකයන් ලෙස අපට නව බලාපොරොත්තුවක් ඇති කර ගත හැකි බවට එය කදිම නිදසුනකි.
ඕවින්දි විෂ්මිකා
