ඉසුරු පරාක්‍රම
කොළඹ (LNW): රට තුළ පවතින අධික උෂ්ණත්වය හමුවේ අද (17) දින දිවයිනේ ප්‍රදේශ කිහිපයකටම කාලගුණ විද්‍යා දෙපාර්තමේන්තුව විසින් තාප දර්ශකයේ “අවධානය (Caution)” මට්ටමේ අවවාද නිකුත් කර තිබේ.
ඒ අනුව, නැගෙනහිර පළාත, උතුරු-මැද පළාත සහ ඌව පළාත ආදී පළාත්වල ඇතැම් ප්‍රදේශවලට ද, කිලිනොච්චිය, වව්නියාව, මුලතිව්, මන්නාරම, මොනරාගල සහ හම්බන්තොට යන දිස්ත්‍රික්කවලට ද මෙම අධික උෂ්ණත්වය පිළිබඳ “අවධානය” මට්ටමේ අවවාද නිකුත් කර තිබේ.
මේ අතර, අද (17) දිනයේ සබරගමුව, බස්නාහිර, මධ්‍යම, දකුණු, වයඹ, ඌව සහ උතුරු-මැද පළාත්වල ස්ථාන ස්වල්පයක සවස් කාලයේදී හෝ රාත්‍රී කාලයේදී වැසි හෝ ගිගුරුම් සහිත වැසි ඇති විය හැකි අතර, සෙසු ප්‍රදේශවල ප්‍රධාන වශයෙන් වැසි රහිත කාලගුණික තත්ත්වයක් පවතින බව ද කාලගුණ විද්‍යා දෙපාර්තමේන්තුව පවසයි.
ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස කාලගුණ විද්‍යා දෙපාර්තමේන්තුව ජනතාවගෙන් ඉල්ලා සිටියි.
මුහුදුබඩ කලාපය:
| වැසි තත්ත්වය: |
| පුත්තලම සිට කොළඹ හරහා ගාල්ල දක්වා වෙරළට ඔබ්බෙන් වන මුහුදු ප්‍රදේශවල ස්ථාන ස්වල්පයක රාත්‍රී කාලයේදී වැසි හෝ ගිගුරුම් සහිත වැසි ඇති විය හැක. |
| සුළඟ: |
| කන්කසන්තුරය සිට මන්නාරම, කොළඹ, ගාල්ල හරහා හම්බන්තොට දක්වා වන මුහුදු ප්‍රදේශවල සුළං නිරිත දෙසින් හමා එන අතර දිවයින වටා වන සෙසු මුහුදු ප්‍රදේශවල සුළං ගිනිකොණ දෙසින් හෝ නිශ්චිත දිශාවකින් තොරව හමා එයි, සුළගේ වේගය පැ.කි.මී. (20-30) පමණ වේ. |
| මුහුදේ ස්වභාවය: |
| දිවයින වටා වන මුහුදු ප්‍රදේශ සාමාන්‍ය ස්වභාවයේ පවතී. ගිගුරුම් සහිත වැසි ඇති වන විට එම මුහුදු ප්‍රදේශවල තාවකාලිකව තද සුළං ඇති විය හැකි අතර එවිට එම මුහුදු ප්‍රදේශ තාවකාලිකව ඉතා රළු විය හැක. |
