ඩීපී එඩියුකේෂන් අයි.ටී කැම්පස් තුළින් ඉගෙනුම ලබන සිසුන් රැකියා වෙළඳපලට යොමු කිරීමට ඩීපී සිලිකන් වැලි අයි.ටී. ඔෆිස් ආරම්භ කිරීමට ධම්මික පෙරේරා මහතා සැරසෙයි.
ශ්‍රී ලංකාවේ ප්‍රමුඛතම ඩිජිටල් අධ්‍යාපන සැපයුම්කරු වන ඩී.පී.එඩියුකේෂන් විසින් නුවරඑළිය ශ්‍රී සීතවනාරාමයේ නැණසරණ අධ්‍යාපන මධ්‍යස්ථානයේ විවෘත කළ “ඩී.පී. එඩියුකේෂන් අයි.ටී. කැම්පස්” ශාඛාවේ ඉගෙනුම ලබන ව්‍යාපෘති සම්පූර්ණ කල සිසුන් වෙනුවෙන් සහතික පත්‍ර ප්‍රදානය කිරීමේ උත්සවය 1200කට අධික පිරිසකගේ සහභාගිත්වයෙන් 2023 නොවැම්බර් මස 11 වනදා උත්සවශ්‍රීයෙන් නුවරඑළිය නගරශාලාවේදි පැවැත්වුණි. එහිදී 2023 ළමාදිනයට සමගාමීව පැවැත්වුණු කෝඩින් තරඟාවලියේ ජයග්‍රාහකයකුට හිමි ත්‍යාගයක් පිරිනැමීමද සිදුවුණි.
මෙම සහතික පත්‍ර ප්‍රදානය කිරීමේ උත්සවය සඳහා ඩීපී එඩියුකේෂන් නිර්මාතෘ සහ සභාපති ධම්මික පෙරේරා මහතා, නුවරඑළිය කටුමාන සීතවනාරාම විහාරාධිපති, සුසරණ ලංකා සමාජ සංවර්ධන පදනමේ සභාපති, රාජකීය පණ්ඩිත දර්ශනපති, පූජ්‍ය ගලහිටියාගොඩ සුමනරතන හිමි ඇතුළු සම්භාවනීය අමුත්තන් රැසක් සහභාගි විය.
මෙහිදී ප්‍රධාන දේශනය සිදුකළ ඩීපී එඩියුකේෂන් නිර්මාතෘ සහ සභාපති ධම්මික පෙරේරා මහතා ඩීපි එඩියුකේෂන් අයි.ටී. කැම්පස් තුලින් ඉගෙනගන්නා ශිෂ්‍ය ශිෂ්‍යාවන්ට ලැබෙන දැනුමේ ඇති වැදගත්කම පැහැදිලි කළ අතර මේ වන විටත් පාසල් සංවර්ධනය වෙනුවෙන් පාසල් 675ක ස්මාර්ට් ක්ලාස් රූම් පිහිටුවා ඇති බව පැවසීය. දැයේ දූ දරුවන්ගේ ඩිජිටල් අධ්‍යාපනය තුළින් ඉහළට ගෙන ඒමට අවශ්‍ය කටයුතු මේ වන විටත් ආරම්භ කර ඇති බව පැවසූ ධම්මික පෙරේරා මහතා ඩීපී එඩියුකේෂන් අයි.ටී. කැම්පස් 92ක් දිවයින පුරා විවෘතව ඇති බවත් එම කැම්පස්වල සිසුන් 80000කට අධික ප්‍රමාණයක් ඉගෙනුම ලබන බවත්, ඊට අමතරව සිසුන් 125000කට අධික ප්‍රමාණයක් ඔන්ලයින් ක්‍රමයෙන් ඉගෙනුම් ලබන බවත් වැඩි දුරටත් සඳහන් කළේය. තමන්ගේ ඉලක්කය දරුවන් මිලියනයකට ඩිජිටල් අධ්‍යාපනය ලබාදීම බවත් එයින් 20%ක ප්‍රමාණයකට මේ වන විටත් අධ්‍යාපනය ලබාදෙමින් සිටින බවත් පැවසීය.
ධම්මික පෙරේරා මහතාගේ දේශනයේ ප්‍රධාන වශයෙන් සඳහන් වූ කරුණක් වන්නේ, ඩීපී එඩියුකේෂන් අයි.ටී කැම්පස් තුළින් අධ්‍යාපනය ලබන සිසුන්ට රැකියා වෙළඳපල සඳහා යොමු කිරීමට තමා දැනටමත් සැලසුම් කර ඇති බව සඳහන් කළේය. ඒ අනුව ඉදිරියේදි ඩීපී එඩියුකේෂන් අයි.ටී. කැම්පස් මධ්‍යස්ථාන තුළ ඩීපී සිලිකන් වැලි අයි.ටී. ඔෆිස් නමින් මධ්‍යස්ථාන පිහිටුවා ඒවා තුළ ඔවුන්ව ගෝලිය රැකියා වෙළඳපොලේ රැකියා කිරීමට ඉඩ සැලසීමට නියමිත බව පැවසීය. එමගින් රටට විදේශ විනිමය ගෙන ඒමට හැකි බවද වැඩිදුරටත් පැහැදිලි කළේය.
RN
