දැනට මෙරට සක්‍රිය තත්වයේ පවතින එකම පළාත් පාලන ආයතනය වන ඇල්පිටිය ප්‍රාදේශීය සභාවේ අයවැය සිව්වැනි වතාවටත් පරාජයට පත්ව තිබේ.
ශ්‍රී ලංකා පොදුජන පෙරමුණට බලය හිමි මෙම ප්‍රාදේශීය සභාවේ අයවැය සඳහා ඊයේ (28) දිනයේදී ඡන්ද විමසීමේදී ඊට විරුද්ධව ඡන්ද 14ක් ලැබී තිබුණු අතර ඊට පක්ෂව ලැබී තිබුණේ ඡන්ද 12ක් පමණි.
අයවැයට පක්ෂව ශ්‍රී ලංකා පොදුජන පෙරමුණ සහ එක්සත් ජාතික පක්ෂය නියෝජනය කරන මන්ත්‍රීවරුන් පිරිසක් මෙන්ම ජාතික ජන බලවේගයේ K.A.D උදය ප්‍රියන්ත මන්ත්‍රීවරයාද ඡන්දය ප්‍රකාශ කර තිබීම මෙහි ඇති විශේෂත්වයකි.
අයවැයට විරුද්ධව ඡන්දය ප්‍රකාශ කළ සමගි ජන බලවේගයේ මන්ත්‍රී කණ්ඩායමට ශ්‍රී ලංකා පොදුජන පෙරමුණේ මන්ත්‍රීවරුන් පිරිසකගේ ද සහාය ලැබී තිබිණි.
කෙසේවෙතත් අයවැය සිව්වැනි වරටත් පරාජයට පත්වීම හේතුවෙන් 2012 අංක 22 දරණ පළාත් පාලන ආයතන ඡන්ද විමසීම් පනතට අනුව මෙම ප්‍රාදේශීය සභාවේ බලය ශූන්‍ය වන අතර එහි පාලනය සඳහා විශේෂ කොමසාරිස්වරයකු පත්කිරීමට සිදුවේ.
RN
