සන්ඩේ ලීඩර් පුවත්පතේ හිටපු කර්තෘ ලසන්ත වික්රමතුංග මහතා ඝාතනය ලක්ව අදට (ජනවාරි 08) වසර 16ක් සපිරේ.
2009 ජනවාරි 08 වනදින උදෑසන 10.25 ට පමණ රත්මලාන බේකරිය හන්දිය ආසන්නයේ, අධිආරක්ෂිත කලාපයක් අසලදී ඔහුව ඝාතනය කෙරුණේ තම කාර්යාලයට යමින් සිටියදී ය. දෙනෝ දාහක් දෙනා ඉදිරිපිට මහපාරේ බෝල්ට් ගන් අවියක් භාවිතා කරමින් සිදුකෙරුණු මෙම ඝාතනය සම්බන්ධයෙන් අදටත් යුක්තිය ඉටුවී නොමැත.
රාජපක්ෂ පාලනය යටතේ මාධ්ය මර්දනයේ කළු සෙවනැලි ශ්රී ලංකාව වසාගෙන තිබුණු ඒ යුගයේ, තම ජීවිතයට අවස්ථා ගණනකදී තර්ජන එල්ල වී තිබියදී පවා ජනතාවට සත්ය තොරතුරු ලබාදීම වෙනුවෙන් වූ සිය මාධ්යකරණයේ වගකීම අත්හැරීමට ලසන්ත වික්රමතුංග සිතුවේවත් නැත. එහි කෙළවර වුණේ ඝාතකයින් විසින් ඔහුගේ ජීවිතය උදුරා ගැනීමයි.
ලසන්ත ඝාතනය ඇතුළු ඒ යුගයේ අපරාධ පෙන්වමින් පසුව ආණ්ඩු පෙරළිත් සිදුවිණි. ලසන්තගේ දේහය පවා යළි ගොඩගැනුණි. එහෙත් යුක්තිය ඉටුකිරීමේ ක්රියාවලිය ඔහේ අතරමග නැවතුණි.
ලසන්ත වික්රමතුංග ඝාතනයේ වගකිවයුත්තන් හෙළිදරව් කරමින් නීතිය ක්රියාත්මක කරන බවට වත්මන් ජනාධිපති අනුර කුමාර දිසානායක මහතා ද සිය මැතිවරණ ව්යාපාරය තුළ පොරොන්දු විය. මේ වතාවේදීවත් එම පොරොන්දුව ඉටුවනු දැකීම යුක්තිය අගයන මෙරට පුරවැසියන්ගේ පැතුමයි.
