නොබැඳි ජාතීන්ගේ සමුළුවේ (NAM) 19 වැනි රාජ්‍ය නායක සමුළුවට හා G77 සහ චීනය 3 වැනි දකුණු සමුළුවට (3rd South Summit of the Group of 77 & China) සහභාගී වීම සඳහා ජනාධිපති රනිල් වික්‍රමසිංහ මහතා උගන්ඩාවට ගොස් තිබේ.
ඒ අනුව අද (18) දිනයේදී ඒ මහතා උගන්ඩාවේ කම්පාලා නුවරට පැමිණ ඇති බවයි ජනාධිපති මාධ්‍ය ඒකකය සඳහන් කරන්නේ.
ජනාධිපතිවරයා මෙම සංචාරයට එක්ව ඇත්තේ උගන්ඩා ජනරජයේ ජනාධිපති යොවේරි මුසෙවිනි (Yoweri Museveni) මහතාගේ ආරාධනය අනුව ය.
නොබැඳි ජාතීන්ගේ සමුළුවේ (NAM) 19 වැනි රාජ්‍ය නායක සමුළුව “හවුල් ගෝලීය සමෘද්ධිය සඳහා සහයෝගීතාව පුළුල් කර ගැනීම” යන තේමාව යටතේ ජනවාරි 19 සිට 20 දක්වා උගන්ඩාවේ කම්පාලා නුවර දී පැවැත්වේ.
G77 සහ චීනය 3 වැනි දකුණු සමුළුව ජනවාරි 21 සිට 22 වනදා දක්වා කම්පාලා නුවරදී පැවැත්වෙන අතර මෙවර එහි තේමාව වී ඇත්තේ ‘කිසිවෙකු අත් නොහරිමු’ යන්න ය.
මෙම සංචාරයේ දී ජනාධිපති රනිල් වික්‍රමසිංහ මහතා සමුළු ද්විත්වයම ඇමතීමට නියමිත අතර අප්‍රිකා කලාපයේ සිටින ගෝලීය දකුණේ රටවල නායකයින් සහ නියෝජිතයින් සමඟ ද සාකච්ඡා පැවැත්වීමට නියමිත බවයි ජනාධිපති මාධ්‍ය ඒකකය වැඩිදුරටත් පවසන්නේ.
ජනාධිපතිවරයා මෙසේ උගන්ඩාවට පැමිණියේ ස්විට්සර්ලන්තයේ පැවති ලෝක ආර්ථික සමුළුවට සහභාගිවීමෙන් අනතුරුව ය.
RN
