සටහන – රුවන් නෙළුගොල්ල
විගණකාධිපති ධුරය සඳහා ජනාධිපති අනුර කුමාර දිසානායක මහතා ආණ්ඩුක්‍රම ව්‍යවස්ථා සභාවට යොමු කළ නිර්දේශය පිළිබඳ තීන්දුවක් ගැනීම ලබන අඟහරුවාදා දිනය දක්වා කල්ගොස් ඇති බව වාර්තා වේ.
මෙම තනතුර සඳහා ජනාධිපතිවරයා මීට පෙර අවස්ථා හතරකදී පුද්ගලයින් 4 දෙනෙකුගේ නම් නිර්දේශ කර තිබුණ ද ඒ සියල්ල ආණ්ඩුක්‍රම ව්‍යවස්ථා සභාව විසින් අනුමත කිරීම ප්‍රතික්ෂේප කර තිබිණි.
ජනාධිපතිවරයා විසින් පස්වැනි වරට එවන ලද නම සම්බන්ධයෙන් සලකා බලා අවසන් තීරණයක් ගැනීම ඊයේ (31) දිනයේදී සිදුකිරීමට නියමිතව තිබුණත් එය ලබන අඟහරුවාදා (03) දිනයේදී සිදුකෙරෙනු ඇති බවයි සභානායක, අමාත්‍ය බිමල් රත්නායක මහතා සඳහන් කළේ.
“විගණකාධිපති ධුරය සම්බන්ධයෙන් ව්‍යවස්ථාදායක සභාව රැස්වෙලා සාකච්ඡා කළා. ජනාධිපතිවරයා අලුත් නමක් එවලා තියෙනවා. ඒක අධ්‍යනය කරන්න සාමාජිකයින්ට යම් කාලයක් ඕනේ. ඒ නිසා අපි පෙබරවාරි මාසේ 3 වැනිදා පාර්ලිමේන්තුව රැස්වෙන දවසෙම මේ පිළිබඳව තීන්දුවක් ගන්නවා”
හිටපු විගණකාධිපති චූලන්ත වික්‍රමරත්න මහතා 2025 අප්‍රේල් මාසයේදී විශ්‍රාම යාමෙන් පසු විගණකාධිපති ධුරය පුරප්පාඩු වූ අතර මේ දක්වාම මාස නවයක් තිස්සේ එම තනතුරට පුද්ගලයකු පත්කර නොමැත.
