තමන්ට බනින කිසිවෙකුට ස්වේච්ඡා දේශපාලනය තෝරාගෙන රට වෙනස් කිරීමේ වගකීමක් ගැනීමට ධෛර්යයක්, හැකියාවක් හෝ කුසලතාවයක් නොමැති බව කර්මාන්ත හා ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ පවසයි.
විරුද්ධ පක්ෂවල දූෂිතයින්ට ඡන්දය ලබාදුන් අයගේ විවේචන තමන් දණහිසින් උඩට නොගන්නා බවයි නියෝජ්‍ය අමාත්‍යවරයා අවධාරණය කරන්නේ.
නියෝජ්‍ය අමාත්‍යවරයා මේ බව පවසා ඇත්තේ ඊයේ (07) පැවති අපනයන සම්මාන උළෙලේදී තමන් මීට පෙර සේවය කළ මාස් හෝල්ඩිංස් ආයතනයට සම්මාන හිමිවෙද්දී නියෝජ්‍ය ඇමතිවරයා වශයෙන් ජනාධිපතිවරයාගේ පසෙකින් වේදිකාවේ සිටින්නට ලැබීමේ ජයග්‍රාහී අවස්ථාව මහත් ප්‍රීතියෙන් යුතුව සමරමින් සමාජ මාධ්‍ය තුළ සටහනක් තබමිනි.
චතුරංග අබේසිංහ යනු ජාතික ජන බලවේගයේ මහලේකම්, විශේෂඥ වෛද්‍ය, පාර්ලිමේන්තු මන්ත්‍රී නිහාල් අබේසිංහගේ පුත්‍රයෙකි. චතුරංග අබේසිංහට නියෝජ්‍ය ඇමති තනතුරක් හිමිවූයේම ජාජබ මහලේකම්වරයා වශයෙන් තමන්ට හිමිවන්නට නියමිතව තිබුණු ඇමති ධුරය වෙනුවට තම පුත්‍රයාට තනතුරක් ලබාදෙන්නැයි නිහාල් අබේසිංහ පක්ෂයෙන් කළ ඉල්ලීමක් අනුව බවට කතාවක් ඒ දිනවල සංසරණය වී තිබිණි.
