සටහන – පුලී
පෙබරවාරි 18, ලෝකය (අවුට්බවුන්ඩ් ටුඩේ): මේවන විට දිල්ලියේ මන්ඩෝලි බන්ධනාගාරයේ සිරකර සිටින චූදිතයෙකු වන සුකේෂ් චන්ද්රශේඛර්, වැලන්ටයින් දිනය වෙනුවෙන් බොලිවුඩ් නිළි ජැකලින් ෆර්නැන්ඩස් වෙත පෞද්ගලික ජෙට් යානයක් තෑගි කර ඇති බව වාර්තා වේ.
මෙම සිදුවීම මඟින් සුකේෂ් සහ ජැකලින්ගේ පලහිලව්ව නැවත වරක් මාධ්ය අවධානයට නතු විය.
විදෙස් වාර්තා වලට අනුව, සුකේෂ් ජැකලින් හට මෙම වටිනා ත්යාගය සමඟ හෘදයාංගමව ලියූ ලිපියක් ද යවා ඇත. පෞද්ගලික ජෙට් යානයේ ඇගේ මුලකුරු තිබූ බවත්, එහි ලියාපදිංචි අංකය ඇයගේ උපන් දිනයට අනුරූප ව ඇති බවත් වාර්තා වේ.
“බබා, ඔබ හැම විටම රූගත කිරීම් සඳහා ලොව වටා පියාසර කරනවා, දැන් මෙම ජෙට් යානය සමඟ, ඔබගේ සංචාරයන් අතිශයින් පහසු වනු ඇතැයි,” සුකේෂ් ඔහුගේ ලිපියේ ලියා සිටියේය. ඔහු තම බදු වාර්තා ප්රකාශ කිරීමෙන් සහ ඊට අවශ්ය බදු ගෙවා ත්යාගයෙහි නීත්යානුකූලභාවය සහතික කර ඇති බවත්, ඔහු වැඩිදුරටත් අවධාරණය කළේය.
චන්ද්රශේඛර්ගේ ලිපිය තුළ ඔහුට ජැකලින් වෙනුවෙන් වැඩුණු සෙනෙහස උතුරා යමින් ඔහු සිය හැඟීම් ප්රකාශ කිරීමට ද මෙය අවස්ථාවක් කරගෙන තිබිණි, “බබා, මේ වැලන්ටයින් දවසේ, මට ඇත්තේ එකම ප්රාර්ථනාවක් – නැවත ඉපදීමක් තිබේ නම්, මට ඔබේ හදවත ලෙස ඉපදීමට අවශ්යයි, එවිට මට ඔබ තුළ ගැහෙමින් පවතිනු ඇතැයි” ඔහු සංවේදීතාවයක් මතු කරමින් එහි සඳහන් කර තිබුණි.
ජැකලින්ගේ නිරන්තර ප්රතික්ෂේප කිරීම් මධ්යයේ, ඔවුන්ගේ ප්රේම සම්බන්ධයක් ඇති බවට මෙවැනි සිදුවීම් තුළින් සුකේෂ් අවධාරණය කරන අතර, ජැකලින් මීට පෙර පවසා ඇත්තේ ඔහු නීත්යානුකූල ව්යාපාරිකයෙකු යැයි විශ්වාස කිරීම තුළින් තමා නොමඟ ගොස් ඇති බවයි.
රුපියල් කෝටි 200 ක කප්පම් සිද්ධියක් සම්බන්ධයෙන් සුකේෂ් චන්ද්රශේකර් දැනට සිරගතව සිටින අතර ඔහුගේ අපරාධ වාර්තාව මෙම නඩුවෙන් ඔබ්බට යනු ඇත. ඔහු 2017 සිට සිරගත කර ඇති අතර බන්ධනාගාරය තුළ සිට කප්පම් ජාවාරමක් පවත්වාගෙන යාමේ චෝදනා ඇතුළුව නඩු 23 කට පමණ සම්බන්ධ වී ඇත. 2023 නොවැම්බර් මාසයේදී මන්ඩෝලි හි මධ්යම බන්ධනාගාර අංක 13 වෙත මාරු කරනු ලැබුවේ ඔහුගේ ක්රියාකාරකම් සම්බන්ධයෙන් සිදු කෙරෙන විමර්ශනයක කොටසක් ලෙසය. ඔහුගේ නීතිමය ගැටලුවලට අමතරව, දිල්ලි මහාධිකරණය විසින් මෑතකදී ඔහුට අත්අඩංගුවේ සිට අත් ඔරලෝසුවක් පැළඳීමට අවසර දුන් නඩු විභාගයේ තීන්දුව අභියෝගයට ලක් කරමින් මැන්ඩෝලි බන්ධනාගාර බලධාරීන්ගේ අභියාචනයක් සම්බන්ධයෙන් නොතීසි ද නිකුත් කරන ලදී. තවද, දිල්ලි බන්ධනාගාරවල සිට ක්රියාත්මක වූ බව කියන කප්පම් ක්රමයක් සම්බන්ධයෙන් මධ්යම විමර්ශන කාර්යාංශය (CBI) ඔහුගේ ප්රකාශ සටහන් කරගෙන ද තිබේ.
