සටහන – රෂිකා හෙන්නායක
පෙබරවාරි, 29 කොළඹ (LNW): අද (29) සිට රුපියල් කෝටි දෙදහසක වියදමින් රට පුරා මාර්ග කිලෝමීටර 1500ක් ප්‍රතිසැකසීමේ ව්‍යාපෘතිය සෑම ප්‍රාදේශීය ලේකම් කොට්ඨාසයකදීම ඇරඹෙන බව සඳහන් වේ.
පසුගිය වසර දෙක තුන තුළ කොවිඩ් – 19 වසංගතය නිසාත් ආර්ථික අර්බුදය නිසාත් සමස්ත රට තුළ මාර්ග පද්ධතිය බරපතළ ලෙස අබලන් වී තිබීමත් පසුගියදා ඇති වුණු ධාරානිපාත වර්ෂාව හේතුකොටගෙන ඇති වූ නායයෑම් හා ගංවතුර තත්ත්වයන් හේතුකොටගෙන මෙවර අය-වැය ලේඛනයෙන් ලබා දී ඇති මූල්‍ය ප්‍රතිපාදන යටතේ දිවයින පුරා මාර්ග කිලෝමීටර 1500ක් ප්‍රතිසැකසුම්කරණය සඳහා මුදල් වෙන් කර ඇති බව සඳහන් වේ.
ඒ අනුව ප්‍රවාහන හා මහාමාර්ග අමාත්‍යාංශය මඟින් අදියර තුනක් යටතේ මෙම යෝජනා ක්‍රමය ක්‍රියාත්මක කිරීමට නියමිත බවත්, අද දින එහි කිලෝමීටර 500ක ප්‍රතිසැකසීමේ කටයුතු ඇරඹීමටත් මාර්තු 16 වැනිදා දෙවැනි කිලෝමීටර 500 හා අප්‍රේල් 02 වැනිදා තෙවැනි කිලෝමීටර 500ත් ප්‍රතිසැකසීමේ කටයුතු ඇරඹෙන බව ද මාර්ග සංවර්ධන අධිකාරියේ අධ්‍යක්ෂ ජනරාල් සර්ධා වීරකෝන් මහතා කියා සිටී.
අධ්‍යක්ෂ ජනරාල්වරයා වැඩිදුරටත් ප්‍රකාශ කළේ, අද (29) උදෑසන සිට මෙරටේ සෑම ප්‍රාදේශීය ලේකම් කොට්ඨාසයකම ප්‍රාදේශීය සංවර්ධන කමිටුවල සභාපතිවරුන් විසින් මාර්ග සංවර්ධන අධිකාරියේ අධීක්ෂණය යටතේ මෙම ව්‍යාපෘතිය ක්‍රියාත්මක කිරීම සිදුවන බවයි.
