සටහන – නිශ්මං රණසිංහ
මාර්තු 01, කොළඹ (LNW): දකුණු ආසියාතික කලාපීය කනිෂ්ඨ බැඩ්මින්ටන් ශූරතාවලියට සහභාගි වීම සඳහා අවුරුදු 15න් පහළ සහ අවුරුදු 17න් පහළ ශ්‍රී ලාංකික ක්‍රීඩක ක්‍රීඩිකාවෝ 8 දෙනෙක් ඊයේ (29) පාකිස්තානය බලා පිටත් වූහ.බාලක සහ බාලිකා කේවල තරග සඳහාත්,එම කාණ්ඩාවල යුගල තරග සඳහාත් මුහුණ දෙන ශ්‍රී ලංකා කණ්ඩායම් නියෝජනය කරන අවුරුදු 15 න් පහළ සහ 17 න් පහළ ක්‍රිඩක ක්‍රීඩිකාවෝ එහිදී මිශ්‍ර යුගල තරග ඉසව්වලින් ද තරගාවලිය නියෝජනය කරති.
පකිස්තානයේ ඉස්ලාමාබාද් නුවර පිහිටි පකිස්තානු ක්‍රීඩා සංකීර්ණයේදී අනිද්දා (3) සිට 7 වැනිදා දක්වා තරගාවලිය පැවැත්වෙන අතර, මුල් දින දෙකේදී කණ්ඩායම් තරගත්, 5-6 දෙදින ඒකල මූලික තරගත් 7 වැනිදා ඒකල අවසන් තරගත් පැවැත්වේ. ශ්‍රී ලංකා කණ්ඩායමේ පුහුණුකරු ලෙස රජිත දහනායක, සහාය පුහුණුකරු ඉරේෂ් මධුරංග ද සිල්වා සහ ක්‍රීඩිකාවන් භාර නිලධාරිනිය ලෙස තරංගා විමලසූරිය ද සංචාරයට එක් වෙති.
තරගාවලියට සහභාගි වන අවුරුදු 15 න් පහළ කණ්ඩායම අමාවන් අමරසිංහ, චෙනාල් දෙව්ෂාන් මඩපාතගේ, තෙනුකි අයන්සා ද සිල්වා, බිනුරි ජනංගා නියෝජනය කරන අතර අවුරුදු 17න් පහළ කණ්ඩායමට මිහිල රවිෂ්ක ක්‍රිෂ්ණ ජයවීර, තේජන සමුදිත හේරත්, නෙත්මි අමායා රත්නායක සහ ලක්ෂණා සජීවකුමාර් ඇතුළත් වෙති.
