සටහන – රුවන් නෙළුගොල්ල
2008 වසරේදී “ද නේශන්” පුවත්පතේ කර්තෘ කීත් නොයාර් මහතා පැහැරගෙන ගොස් අමානුෂික ලෙස පහරදී වධහිංසාවට ලක්කිරීම සම්බන්ධයෙන් අත් අඩංගුවට ගත් තවත් හිටපු යුධ හමුදා බුද්ධි අංශ නිලධාරියෙකු ඇප මත නිදහස් කිරීමට ගල්කිස්ස මහේස්ත්‍රාත් අධිකරණය අද (03) නියෝග කර තිබේ.
ඒ අනුව, සැකකාර විශ්‍රාමික බුද්ධි අංශ සාමාජිකයා රුපියල් ලක්ෂ 05 බැගින් වූ ශරීර ඇප දෙකක් මත නිදහස් කරන ලෙසයි ගල්කිස්ස අතිරේක මහේස්ත්‍රාත් හේමාලි හාල්පන්දෙනිය මහත්මිය නියම කර ඇත්තේ.
මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව විසින් පෙරේදා දිනයේදී අත් අඩංගුවට ගෙන තිබුණු තවත් හිටපු යුධ හමුදා බුද්ධි අංශ සාමාජිකයින් දෙදෙනෙකු ද ඊයේ (02) දිනයේදී අධිකරණයට ඉදිරිපත් කිරීමෙන් අනතුරුව ඇප මත නිදහස් කර තිබිණි.
