සටහන – රුවන් නෙළුගොල්ල
ජාතික ජන බලවේගයේ ආණ්ඩුව වැඩක් නොකරන බවට බොහෝ දෙනා චෝදනා කරන බවත් මැයි 06 වනදා ප්‍රාදේශීය සභා මැතිවරණය අවසන් වීමෙන් අනතුරුව තම ආණ්ඩුව වැඩ පටන් ගන්නා බවත් නිවාස නියෝජ්‍ය අමාත්‍ය ටී. බී. සරත් මහතා පවසයි.
“දැන් හැමෝම කියන්න පටන් අරන් තියෙනවා ආණ්ඩුව වැඩකරන්නෙ නෑ කියලා. ආණ්ඩුව වැඩක් නෑ. සජබෙට අනුව නම් මොකුත්ම කරන්නෙ නෑ අපි. දැන් මේකත් කෝටි දහය හමාරකට වඩා වැඩි ව්‍යාපෘතියක්. ලක්ෂ 10,000 කට ආසන්න ව්‍යාපෘතියක්. ඉතින් අපි ව්‍යාපෘති පටන් ගන්නවා. තව ටික දවසකින් අයවැය ලේඛනය සම්මත වෙලා ගමට එනකොට අපි ගොඩාක් ව්‍යාපෘති දාලා තියෙනවා. මේ සුංගාවිල ජනතාවට වතුර ලබාදීම සඳහා මුදල් වෙන්කරලා තියෙන්නෙ. මේ අවුරුද්ද අවසන් වෙනකොට සුංගාවිල සහ එතනින් එහා සියලුම ජනතාවට පිරිසිදු පානීය ජලය ලබාදෙන්න අපි කටයුතු කරනවා. ඊටපස්සෙ මුස්ලිම් පාසල් දෙකක ගොඩනැගිලි අවශ්‍යතාවය කියලා තියෙනවා, අපි ඒකත් මේ අවුරුද්දේ අධ්‍යාපන අමාත්‍යාංශය හරහා දාන්න බලාපොරොත්තු වෙනවා. ඒ විතරක් නෙවෙයි, ප්‍රාදේශීය සභා මැතිවරණය අවසන් වෙනවා මැයි මාසේ 06. මේ වසර අවසන් වෙනකොට සියලුම ග්‍රාමීය පාරවල් ටික බොරළු හරි මොනවාහරි දාලා වැඩ කරන්න අපි බලාපොරොත්තු වෙනවා. මැයි මාසෙ 06 ප්‍රාදේශීය සභා මැතිවරණය අවසන් වුණාම අපි වැඩ පටන් ගන්නවා. දැන් ප්‍රාදේශීය සභාවෙ බලය නෑනෙ, විධායක බලය නෑ. අපි ඒ විධායක බලය ලබාගන්නවා. අති විශිෂ්ට ජයග්‍රහණයක් ලබනවා, කිසි කෙනෙක් සැකයක් තියාගන්න එපා”
ටී. බී. සරත් නියෝජ්‍ය අමාත්‍යවරයා මේ බව පැවසුවේ ඊයේ (මාර්තු 26) පොලොන්නරුව ප්‍රදේශයේ පැවති උත්සවයක් අමතමිනි.
