සටහන – නිශ්මං රණසිංහ
මාර්තු 31, කොළඹ (LNW): ආසියානු ත්‍රිත්ව සාමාජික පැසිපන්දු තරගාවලියේදී මෙවර ශ්‍රී ලංකා පිරිමි කණ්ඩායම ඉහළ දස්කම් දක්වන්නට සමත් වුණා.සුදුසුකම් ලැබීමේ වටය සඳහා තේරීමේ තරගවලදී ඔවුන් දකුණු කොරියාව,උතුරු මරියානා දූපත සහ ඉන්දුනීසියාව කියෝජනය කළ බී කාණ්ඩයෙන් අපරාජිතව පෙරමුණ ගත්තා.දකුණු කොරියාව පරාජය කරමින් ඔවුන් ඉදිරි වටයට පැමිණීමට සමත්වීම කැපී පෙණුන අතර සුදුසුකම් ලැබීමේ වටයේදී ඔවුන්ගේ ප්‍රතිවාදීන් වුණේ මොංගෝලියාව සහ තායිලන්තයයි.
මොංගෝලියාව තරගයේදී කරට කර සටන් කර,ලකුණු සම මට්ටමේ පවත්වා ගනිමින් තරගය අතිරේක කාලය දක්වා රැඟෙන යන්නට ශ්‍රී ලංකා ක්‍රීඩකයින් සමත් වුණා.එහිදී අතිරේක කාලයේ දී මොංගෝලියාව ලකුණු 15 – 13 ක් ලෙස ඉදිරියට එන්නට හැකියාව ලැබුණා.තායිලන්තය සමඟ පැවති දෙවන තරගයේ දී ශ්‍රී ලංකාවට ලකුණු 21 – 9 ක් ලෙස පරාජය වීමට සිඳු වුණත් සමස්ත තරගාවලිය ගත් විට ශ්‍රී ලංකාව ඉහළ දස්කම් දක්වන්නට සමත් වුණා.
රුක්ෂාන් අතපත්තු,පවන් ගමගේ,දසුන් නිලන්ත මෙණ්ඩිස් සහ සිම්රොන් යෝගනාදන් මෙහිදී ශ්‍රී ලංකාව නියෝජනය කරමින් තරග වැඳුණා.තරගාවලියේ අවසන් කණ්ඩායම් අට තුළ ශ්‍රී ලංකාව පරාජය වූ මොංගෝලියාව සහ තායිලන්තය යන කණ්ඩායම් දෙකම තිබීම කැපී පෙනෙනවා.සුදුසුකම් ලැබීමේ වටය නිමාවේ ශ්‍රී ලංකාව සමස්ත කණ්ඩායම් අතර 12 වන තැන සිටින අතර දකුණු ආසියාතික කළාපය ගත් විට ඉන්දියාවට ඉදිරියෙන් සිටිමින් මේ තරගාවලියේ දස්කම් දක්වන්නට ශ්‍රී ලංකාවට හැකි වී තිබෙනවා.
