නිශ්මං රණසිංහ අප්‍රේල් 05 කොළඹ LNW :
ලංකාවෙ මලල ක්‍රීඩාවට අතිශයින් වැදගත් ජාත්‍යන්තර තරග සහභාගීත්වයන් ගැන මේ දිනවල නිතර කරන කතා ඇහෙනවා.තරගාවලි සංවිධානය වීමේ කතාත් පැවසෙනවා.ඒත් ලංකාවට තියෙන ඉහළ මට්ටමේ ක්‍රීඩාංගණ පහසුකම් සහිත මලල ක්‍රීඩා තරග පැවත්වීමට උචිත ක්‍රීඩා පිටියේ තත්ත්වය තමයි මේ ඡායාරූපවලින් දැකගන්නට පුළුවන්.
මේක අතිශයින් නරක තත්ත්වයක්.මේ තත්ත්වය දක්ෂතාවල වර්ධනයට බාධා කරනවා වගේම ආබාධවලට අත වැනීමක් වෙන්නත් පුළුවන්.නරකම තත්ත්වය එයයි.
ශ්‍රී ලංකාව වෙනුවෙන් ඔලිම්පික් නියෝජනය කළ ක්‍රීඩකයෙක්,නියෝජ්‍ය අමාත්‍යවරයෙක් ලෙස සිටීම පාර්ල්මේන්තුවේ පමණක් නොවේ ජාතික ජන බලවේග රජය ඉන් පිටතත් සිය ප්‍රචාරණය සඳහා යොදා ගත්තා.හරියට අම්බිගා මන්ත්‍රීවරිය වතු ජනතාවගේ නියෝජනයක් සහ ලැයිම් කාමරයකට මන්ත්‍රීවරියක් අයිති කිරීම දක්වා වූ වැඩ සටහනෙන් එහාට ඔවුන්ට ලැබුණ දේ ගැන ප්‍රශ්නාර්ථයක් මතු වී තිබෙනවා වගේමයි.
සුගත් තිලකරත්න මේ වන විට හදිසියේ දුරකතනයකට හෝ ගෙන්නා ගත නොහැකි කාර්ය බහුල තත්ත්වයකට පත් කර තිබෙනවා හැරෙන්න මේ ඇමති තනතුරෙන් ඔහුගෙන් ක්‍රීඩාවට ලැබුණ දෙයක් තිබෙනවාද යන ප්‍රශ්නය මතු වෙනවා.ක්‍රීඩකයෙක් ලෙස මිස පරිපාලන අත්දැකීම් සම්බන්ධයෙන් වන ප්‍රශ්නයක් ඔහුට තිබෙන්නට පුළුවන්.ඒක ප්‍රායෝගිකයි.ඒත් මෙහෙම තත්ත්වයක් තුළ ජාතික මට්ටමේ ක්‍රීඩකයින් පුහුණුවෙන්නෙ කොහොමද සහ ඒක භයානකයි කියන එක සහ ඇති විය හැකි ආදීනව සුගත් ක්‍රීඩකයෙක් විදිහට හොඳට දන්නවා.අඩුම ගණනෙ ඒ ප්‍රායෝගික තත්ත්වය සුගත් නොදුටු නියාව සිටිනවා ද නැතිනම් සුගත්ව නෑසු කන්ව ඊට ඉහළ ආණ්ඩුවේ පිරිස සිටිනවාද කියන කාරණය දන්නෙ සුගත්ම තමයි.මොකද අද වන විට බොහෝ වෙලාවට ඔහුව සම්බන්ධ කර ගන්න හදන උත්සාහයකදි අහන්න ලැබෙන්නෙ ඔහුගේ කටහඬ නෙමෙයි.දුරකතනය නාද වන ශබ්දය පමණයි.
මේ සම්බන්ධයෙන් මලල ක්‍රීඩාවට සම්බන්ධ අයට ලොකු අදහසක් නැහැ.ඒ අය තරගයට මේ වෙලාවෙ කරමින් ඉන්නෙ අලුතෙන් මතුවෙමින් තිබන අතිදක්ෂ ලාබාල ක්‍රීඩක ක්‍රීඩිකාවන් තමන්ගේ ආයතනයටත්, ඊටත් එහා ගිහිං තමන්ගේ ඒකකයටත් බඳවා ගැනීමට තරග කිරීම පමණයි.ඒ බඳවා ගන්න එකා අනාගතයෙ දුවන්නෙ පනින්නෙ වීසිකරන්නේ මේ පසුතලය මතනම් ඔහුටවත් රටටවත් අනාගතයක් නැති බව හැඟෙන්නෙ නැති එක කණගාටුවක්.
ළමයි පස්සෙ දුවන මහත්තුරු ටික අනිත් පැත්තට හැරිලා කිව්වොත් ත්‍රිවිධ හමුදාවට එකතු වෙලා මේ ධාවන පථය දාන්න පුළුවන්.වියදම අඩු කර ගන්න පුළුවන්.2001 දී විතර ලංකාවෙ ධාවන පථයක් සැකසීම සඳහා ඉදිරිපත් කළ ආයතනයක් ඒ සඳහා ගෙන එන සියලු යන්ත්‍ර ලංාවේ තබා ගන්නා බව ද සඳහන් කළා.එහෙත් එම ආයතනයේ ධාවන පථය ප්‍රතික්ෂේප කරලා ඊට වඩා බාල වර්ගයේ ධාවන පථයකට යන්න දේශපාලකයො සහ නිලධාරි කටයුතු කළා.එහෙම වුණානම් යන්ත්‍ර සූත්‍ර සමඟ අඩු වියදමකින් ලංකාව ඇතුළෙ තවත් ධාවන පථ නිර්මාණය කරන්න හැකියාව තිබෙනවා.ඒ වගේම ඒ වෙලාවෙ ගෙනාපු විද්‍යුත් පූවරු දකින්න තිබුණෙ තිතක් විතරය.මාධ්‍ය කුටියේ ඒ ගැන මම කිව්වෙ තිතට වැඩ කියන කතාව නාමල් පතිරගේ මිත්‍රයා ලංකාදීපෙ ඒ විදිහටම ඡායාරූපයක් සමඟ පළ කරලා තිබුණා.
මේ ඉතිහාස කතාව මතක් කරේ නැවත ධාවන පථය ගේන විට යන්ත්‍ර සූත්‍ර කතාවත් වැදගත් වන නිසයි.ලංකාව වැනි රටකට වන්නෙ ප්‍රීෆැබ්රිකේට් තාක්ෂණයට වඩා ඉන්සිටු කියන තාක්ෂණයයි.එහිදී හානිවන කොටස පමණක් නැවත සකස් කරන්න පුළුවන්.ඒත් ඊට අවශ්‍යය උපකරණ තිබිය යුතු නිසා මෙවර ධාවන පථය එලීමේදී එම උපකරණ ලංකාවේ තිබෙන ආයතනයක් බවට ධාවන පථය එලන ආයතනය පත්විය යුතුයි.ඒ නිසා මේ කාරණයේදී ත්‍රිවිධ හමුදාව මත යැපීම වැදගත් විය හැකියි.
එසේම ත්‍රිවිධ හමුදාව සහ උපදේශනයට මොරටුව සහ පේරාදෙණිය විශ්ව විද්‍යාලවල ඉංජිනේරු පීඨ සම්බන්ධ කර ගැනීමත් වැදගත් වෙයි.මේ සියල්ල කරන්න තියෙන්නෙ ආශ්වාස ප්‍රාශ්වාස කරන කාලය තරමට ඉක්මනින් ක්‍රියාත්මක විය යුතු කාලයක් පමණයි.නැත්නම් මලල ක්‍රීඩාවේ හුස්ම හිරවෙන තරමේ අර්බූදයක් ඇති වෙන්න පුළුවන්.ඒ කළ හැකි ආකාරය අපේ අත්දැකීම් සමඟ හරියන්න තිබුණ හොඳම විදිහ සහ වැරදුණු තැන් සහිත ඉතිහාසය ගලපලා ලිව්වෙ මේ රටේ ජනතාවට සහ ක්‍රීඩාවට ආදරේ අයට හෝ මැදිහත් වෙන්න.නැත්නම් මෙවැනි කාරණා කීමට පත් කර ගත් ජාතික ක්‍රීඩා සභාවක් අමාත්‍යවරයාට සිටිනවා.එසේම ඒ අයගේ දැණුම මිස මාධ්‍ය කියන දේවල් නොකර යුතු බවට අමාත්‍යවරයා මාධ්‍යයටම කියා තිබෙනවා.එතරම් දැනුවත් වීමකින් වැඩ කරන බවත් ඔහු කියනවා.
මාධ්‍යයට ඇවිත් ඔහු දියගම ගැන කියලා හෙළිදරව් කරපු නම් සමඟ අද එකම වේදිකාවෙ කතා කරන තත්ත්වයට දියුණු වෙලා තියෙනවා.වැරදි දේවල් නිසා ඔවුන්ට පය ගහලා ප්‍රසිද්ධියේ ඉදිරියට එන්න බැරි තරමට අපකීර්තියට පත් වී තිබුණු කේෂ්ත්‍රවල සභාවන් ඇමතිවරයා සමඟම කතා කරන්න තරමටම විතරක් නෙමෙයි,සමස්ත ක්‍රීඩාවේම නැගීමට උපදෙස් දෙන මට්ටමටත් පත් කරලා තියෙනවා.එහෙම වාතාවරණයක මේ සටහන හිත නිදහස් කර ගැනීම වෙනුවෙන් විය යුතු දේ අත්දැකීම් ඇසුරෙන් පැවසීම මිස ලංකාවේ ක්‍රීඩා අමාත්‍යවරයා මේ දේවල් විශ්වාස කරයි කියන හැඟීමෙන් ලියූ දෙයක් නෙමෙයි.
ඔහු විශ්වාස කරන දේ සහ පැවසූ දේ සම්බන්ධයෙන් මාධ්‍යකරුවන් බොහෝ දෙනෙකු ඉන්නේ ඔහු සියල්ල දන්නවා යන ලීලාවෙන් වැඩ කරන අනෙකාගේ මතය සහ දැණුම ශත පහකින්වත් ගත යුතුය යන තැන නොසිටින පුද්ගලයෙකු මතයි.හැබැයි බොහෝ දෙනෙක් එය නොලියනවා හෝ නොකියන බව අපත් දන්නවා.මාධ්‍ය සමාජය තුළ වැඩියෙන්ම හිනාවෙන අය සමහර විට ඔහු සමඟ පැය ගණන් හුරතල් වෙනවාද විය හැකියි.ඒත් ඇමතිතුමනි ඔබ දරුවෙකු ලෙස හුරතල් කර ආදරයෙන් සැකසිය යුතු ක්‍රීඩා සමාජය අනාථ මව්පිය රැකවරණය නොමැති දරුවෙක් බවට පත්වෙමින් සිටීම ගැන අපට දුකයි කණගාටුයි.
මේ පිංතූරේ විදිහට තියෙන පිට්ටනියක ක්‍රිඩකයො අනාරක්ෂිතයි.දුර්වලයි.ඒ ඇයි කියලා සුගත් තිලකරත්න නොදැන ඉන්න විදිහක් නැහැ.පුළුවන්නම් අහලා බලන්න.අපට ඔහු දන්නවාද නොදන්නවාද කියා දැන ගැනීමට සුගත්ව ඇමතිමට අපහසුයි.
