සටහන: සශිකලා මධුෂාණි
අප්‍රේල් 05; ලෝකය(අවුට්බවුන්ඩ් ටුඩේ) :තායිලන්තයේ පැවති සමුළුවකින් සහ කලාපීය ජාතීන්ගේ නායකයින් සමඟ පැවති රැස්වීම් මාලාවකින් අනතුරුව ආරක්ෂක සහ බලශක්ති සබඳතා පුළුල් කිරීම සඳහා ඉන්දීය අග්‍රාමාත්‍ය නරේන්ද්‍ර මෝදි ශ්‍රී ලංකාවට පැමිණ සිටියි.
ශ්‍රී ලංකා ජනාධිපති අනුර කුමාර දිසානායක මහතා මෝදි මහතාට රතු පලස් එලා අගනුවර නිදහස් චතුරශ්‍රයේදී ඇති උත්කර්ෂවත්ව පිළිගනු ලැබූ අතර ශ්‍රී ලංකාවෙන් විදෙස් නායකයන්ට පිරිනමන ඉහළම සිවිල් ගෞරවය වන මිත්‍ර විභූෂණ සම්මානය ද මෙහිදී පිරිනමා තිබේ.
පසුගිය වසරේ පැවති මැතිවරණයෙන් වාමාංශික දිසානායක මහතා ජයග්‍රහණය කිරීමෙන් පසු දිවයිනට පැමිණි පළමු විදේශීය ප්‍රභූවරයා ඉන්දීය නායකයා වේ.
මෙහිදී ශ්‍රී ලංකා හමුදා නිලධාරීන් ඉන්දියාවේ පුහුණු කිරීම මෙන්ම තොරතුරු හා තාක්ෂණ බෙදාගැනීම සඳහා දෙරට පස් අවුරුදු ආරක්ෂක සහයෝගීතා ගිවිසුමකට අත්සන් තැබූ අතර ඊට අමතරව විදුලිබල ජාල සම්බන්ධතාවය, ඩිජිටල්කරණය, ආරක්ෂාව සහ සෞඛ්‍ය සේවා පිළිබඳ ගිවිසුම් ද අත්සන් කර ඇත.
ශ්‍රී ලංකා ජනාධිපතිවරයා මෙහිදී සඳහන් කර තිබුණේ, කලාපීය බලවතෙකු ලෙස පමණක් නොව ලෝක බලවතෙකු ලෙස ඉන්දියාවේ නැගීම ප්‍රශංසනීය බවත්, ශ්‍රී ලංකා භූමිය ඉන්දියාවේ ආරක්ෂාව අඩපණ කිරීම සඳහා කිසිවෙකුට භාවිතා කිරීමට ඉඩ නොදෙන බවත්ය.
ශ්‍රී ලංකාවේ මුදල් අමාත්‍යාංශ දත්ත වලට අනුව, ශ්‍රී ලංකාව ඉන්දියාවේ EXIM බැංකුවට සහ ඉන්දියානු රාජ්‍ය බැංකුවට ඩොලර් බිලියන 1.36 ක පමණ ණය ගෙවිය යුතුය.
