රටේ ජනාධිපතිවරයාටත්, අගමැතිවරයාටත්, ආණ්ඩුවටත් වඩා ආණ්ඩුක්‍රම ව්‍යවස්ථාව බලසම්පන්න බව පාලකයින් අවබෝධ කරගත යුතු බවත්, ප්‍රජාතන්ත්‍රවාදීව අරගල කරන ජනතාවට එරෙහිව තර්ජනය මර්දනය ගර්ජනය පාවිච්චි කරන්නට ආණ්ඩුව කටයුතු කරනවානම් අරගල කරන ජනතාවට ඉදිරියෙන් සිට ඔවුන්ව ආරක්ෂා කරන පලිහ බවට පත්වීමට සමගි ජන බලවේගය සූදානම් බව විපක්ෂ නායක සජිත් ප්‍රේමදාස මහතා පවසයි.
ආණ්ඩුක්‍රම ව්‍යවස්ථාවෙන් ජනතාවට ලබාදී ලබාදී ඇති මූලික අයිතිවාසිකම් උල්ලංඝනය කිරීමට ජනාධිපති ගෝඨාභය රාජපක්ෂටවත් අගමැති මහින්දටවත්, රාජපක්ෂ පවුලටවත්, ආණ්ඩුවටවත් බලයක් නැති බව බව ද විපක්ෂ නායකවරයා ප්‍රකාශ කළේය.
සඳළුතලයක ජීවත් වන ජනාධිපතිවරයාට හෝ ආණ්ඩුවට ජන අරගලයේ හඬ ඇහෙන්නේ නැති බව පැවසූ විපක්ෂ නායකවරයා, ජන අරගලයේ සියලු ඉල්ලීම් වලට සමගි ජන බලවේගය සංවේදී බව ද පැවසීය.දෝෂාභියෝගය විශ්වාසභංගය මෙන්ම විසි වෙනි ආණ්ඩුක්‍රම ව්‍යවස්ථාව ආපසු හකුලා දහනව වැනි ආණ්ඩුක්‍රම ව්‍යවස්ථා සංශෝධනය ගෙන ඒමටද තමන් ඇපකැප වී ඇත්තේ ඒ නිසා බවයි ඒ මහතා සඳහන් කළේ.
විපක්ෂ නායක සජිත් ප්‍රේමදාස මහතාගේ සංකල්පයක් ලෙස ක්‍රියාත්මක “සමගි ජන බලවේගයෙන් හුස්මක්” වැඩසටහනට සමගාමීව සුවපත් දේශයක් බිහි කිරීම අරමුණු කොටගෙන ‘ජන සුවය’ ව්‍යාපෘතියෙන් සිදුකරන ලද සමාජ සත්කාර වැඩසටහනෙහි 49වන පියවර ලෙස රුපියල් විසිහය ලක්ෂ පනස් තුන්දහසක් (රු. 2,653,000) වටිනා අත්‍යවශ්‍ය රෝහල් උපකරණ ඊයේ (16) විපක්ෂ නායකවරයා විසින් අම්පාර තිරුක්කෝවිල් මූලික රෝහලට පරිත්‍යාග කරනු ලැබීය.
කොරෝනා ව්‍යසනය හේතුකොටගෙන පීඩාවට පත් ජනතාවට සෞඛ්‍යමය සහන සලසනු වස් සමගි ජන බලවේගයේ මන්ත්‍රී කණ්ඩායම, සංවිධායකයින්, සාමාජිකයින්, සමගි ජන බලවේගයේ විදේශීය ශාඛා, දෙස් විදෙස් ආධාරකරුවන් සහ “ජනසුවය” ව්‍යාපෘතිය එක්ව “සමගි ජන බලවේගයෙන් හුස්මක්” වැඩසටහන ක්‍රියාත්මක කෙරේ.
මීට පෙර වට 48ක් තුළ රුපියල් ලක්ෂ 1289ක (රුපියල් 128,997,900) රෝහල් උපකරණ ලබාදීමට සමගි ජන බලවේගය කටයුතු කරනු ලැබීය.
RN
