ජනාධිපතිතුමා විපක්ෂයේ සිටින සමයේ ජාත්‍යන්තර මූල්‍ය අරමුදලට යන ලෙස එතුමාත් සමගි ජන බලවේගයත් දිගින් දිගටම පැවසුවත් එවක මුදල් ඇමතිව සිටි බැසිල් රාජපක්ෂ කියා සිටියේ ජාත්‍යන්තර මූල්‍ය අරමුදල විසින් රට විනාශ කරන්නේය යනුවෙන් බවත් එවක ජාත්‍යන්තර මූල්‍ය අරමුදලට යෑම වැළැක්වූ පිරිස අද ජනාධිපතිතුමා කියන කියනදේට අත උස්සන බවත් එදා තමා ඇතුළු පිරිස කියා සිටි දේ කළා නම් අද රටට මෙවැනි තත්ත්වයක් ඇති නොවන බවත් විපක්ෂ නායක සජිත් ප්‍රේමදාස මහතා පවසයි.
දින 52 ආණ්ඩු සමයේ වත්මන් ජනාධිපතිවරයා අගමැතිකමින් ඉවත් කර තමාට 71 වතාවක් අගමැතිකම බාර ගන්නා ලෙස එවක විපක්ෂයේ සිටි මන්ත්‍රීවරුන් කියා සිටියත් එම ඉල්ලීම ප්‍රතිපත්තියක් ලෙස ප්‍රතික්ෂේප කර සිටියේ කිසිම අවස්ථාවක ඔවුන් සමග එකට එකතු වීමට තමාට අවශ්‍ය නොවන නිසා බවත් විපක්ෂ නායකවරයා අවධාරණය කළේය.
විපක්ෂ නායක සජිත් ප්‍රේමදාස මහතා මේ බව කියා සිටියේ ඊයේ (26) පාර්ලිමේන්තුවේ දී ජනාධිපති රනිල් වික්‍රමසිංහ මහතාගේ කතාවට පිළිතුරු ප්‍රකාශයක් ඉදිරිපත් කරමිනි.
එසේ ම මුදල් කමිටුවේ විපක්ෂයේ නියෝජිතයා ලෙස ආචාර්ය හර්ෂ ද සිල්වා මැතිතුමා යෝජනා කළ බවත් මේ කටයුතු හොඳ හිතින් සිදු කරනවා නම් මේ මුදල් කමිටුවේ සභාපතිකම හර්ෂ ද සිල්වා මැතිතුමාට ලබා දෙන ලෙසත් ඒ සඳහා ඔහු ඉතා සුදුසු පුද්ගලයකු බවත් විපක්ෂ නායකවරයා සඳහන් කළේය.
RN
