කොළඹ ගාලුමුවදොර අසල ගෝඨා ගෝ ගම විරෝධතාවය සම්බන්ධයෙන් පොලීසිය විසින් කොළඹ මහේස්ත්‍රාත් අධිකරණය වෙත තවත් ඉල්ලීමක් සිදුකර තිබෙනවා.
අද මෙම ඉල්ලීම සිදුකළ අවස්ථාවේදී කොළඹ අතිරේක මහේස්ත්‍රාත් හර්ෂණ කැකුණවෙල මහතා ප්‍රකාශ කළේ මෙම ඉල්ලීම සලකා බැලීමෙන් ඉවත් වන බවයි. අතිරේක මහේස්ත්‍රාත්වරයා ප්‍රකාශ කළේ පොලීසියේ මෙම ඉල්ලීම වෙනත් මහේස්ත්‍රාත්වරයෙකු හමුවට ඉදිරිපත් කිරීමට කටයුතු කරන බවයි.
නීතිපතිවරයා වෙනුවෙන් අධිකරණය හමුවේ පෙනී සිටි රජයේ නීතිඥ ශවේන්ද්‍ර වික්‍රම මහතා ප්‍රකාශ කළේ ගෝඨා ගෝ ගම විරෝධතාවය සම්බන්ධයෙන් මේ වනවිටත් නඩු දෙකක් ගොනුකර ඇති බවයි. මෙම ඉල්ලීම සලකා බැලීමට අධිකරණය සූදානම් නම් නීතිපතිවරයා වෙනුවෙන් එම ඉල්ලීම තමා ඉදිරිපත් කරන බව ඔහු වැඩිදුරටත් සඳහන් කළේය.
අරගලකරුවන් වෙනුවෙන් නීතිඥ කණ්ඩායමක් සමග අධිකරණය හමුවේ පෙනී සිටි ශ්‍රී ලංකා නීතිඥ සංගමේ සභාපති සාලිය පීරිස් මහතා, රජයේ නීතිඥවරයා ඉදිරිපත් කළ කරුණු සම්බන්ධයෙන් විරෝධය ප්‍රකාශ කර සිටියේය.
පොලීසිය විසින් නීතිපතිවරයා හරහා සිදුකළ ඉල්ලීම කුමක්ද යන්න පිළිබඳව විවෘත අධිකරණයේදී හෙලිදරව් නොවිණි.
විරෝධතාවලට එරෙහිව පොලීසිය නැවතත් අධිකරණයට යාම හේතුවෙන් ගෝඨා ගෝ ගම විරෝධතාවය විසුරුවා හැරීමට උත්සාහ දරන බවට අරගලකරුවන් අතර සැකයක් මතුව ඇති අතර මේ නිසා ගෝඨා ගෝ ගම අරගලයට සහාය දැක්වීම සඳහා විශාල පිරිසක් ගෝල්ෆේස් ක්‍රීඩාංගනය අසලට රැස්වෙමින් සිටින බවද වාර්තා වේ.
UN
