වටරැක බන්ධනාගාරයේ රඳවා සිටින බන්ධනාගාර රැඳවියන් 58 දෙනෙකු අතුරුදන් වී ඇති බව බන්ධනාගාර කොමසාරිස් ජනරාල් තුෂාර උපුල්දෙනිය මහතා පවසනවා.
මෙම රැඳවියන් පිරිස කොල්ලුපිටිය ඉදිකිරීම් ආයතනයක සේවයේ යොදවා ඇති අතර ඊයේ පස්වරුවේ ඔවුන් නැවත බන්ධනාගාරයට ප්‍රවාහනය කරමින් තිබියදී මාලබේ තලාහේන ප්‍රදේශයේදී ප්‍රහාරයක් එල්ල වී තිබෙනවා. මෙම ප්‍රහාරය අතරතුර අදාල රැඳවියන් පිරිස මගහැරී ඇති බවයි බන්ධනාගාර කොමසාරිස්වරයා සඳහන් කරන්නේ.
මෙම රැඳවියන් සම්බන්ධයෙන් තොරතුරු දන්නේ නම් ඔවුන්ට කිසිදු හානියක් සිදු නොකර ලඟම ඇති පොලිස් ස්ථානයට බාරදීමට කටයුතු කරන ලෙස උපුල්දෙනිය මහතා ජනතාවගෙන් ඉල්ලා සිටිනවා.
මේ අතර, ඊයේ ගෝඨා ගෝ ගම විරෝධතාවයට එල්ල වූ ප්‍රහාරය සඳහා බන්ධනාගාර රැඳවියන් භාවිතා කර ඇති බවට එල්ල වන චෝදනා සම්පූර්ණයෙන් අසත්‍ය බවයි බන්ධනාගාර කොමසාරිස්වරයා සඳහන් කරන්නේ. එවැනි කිසිදු නීතිවිරෝධී කටයුත්තක් සඳහා මෙම රැඳවියන් යොදාගෙන නොමැති බවද ඔහු වැඩිදුරටත් පවසනවා.
බන්ධනාගාර කොමසාරිස්වරයා නිකුත් කර ඇති නිවේදනයක මෙම කරුණු සඳහන් වේ.
UN
