බස්නාහිර පළාත් ආණ්ඩුකාර හනීෆ් යූසුෆ් මහතා එම ධුරයෙන් ඉල්ලා අස්වීමට අපේක්ෂාවෙන් සිටින්නේ යැයි ජනාධිපතිවරයාට දැනුම් දී ඇති බව නිවේදනයක් නිකුත් කරමින් ඊයේ (17) දිනයේදී ප්‍රකාශ කර තිබිණි.
ඒ අනුව පුරප්පාඩු වීමට නියමිත බස්නාහිර පළාත් ආණ්ඩුකාර ධුරය සඳහා ඉරාන් වික්‍රමරත්න මහතා පත්කිරීමට යෝජනා වී ඇති බව අභ්‍යන්තර ආරංචිමාර්ග පවසයි.
සමගි ජන බලවේගයේ හිටපු පාර්ලිමේන්තු මන්ත්‍රී ඉරාන් වික්‍රමරත්න මහතා ශ්‍රී ලංකා ක්‍රිකට් පරිවර්තනීය කමිටුවේ සභාපතිවරයා වශයෙන් පත්වීම භාරගත්තේ පසුගිය අප්‍රේල් 29 වනදා ය. එහෙත් මේ වනවිට ශ්‍රී ලංකාවට පැමිණ සිටින ජාත්‍යන්තර ක්‍රිකට් කවුන්සිලයේ නියෝජිතයින් ඉරාන්ගේ පත්වීම පිළිබඳ දැඩි කණස්සල්ල පළකර ඇති බව ආරංචිමාර්ග පවසයි. ඒ, ඔහු සෘජුවම දේශපාලනික චරිතයක් වන නිසා ය.
ඒ අනුව තව මාස තුනක් ඇතුළත අනිවාර්යයෙන්ම ක්‍රිකට් නිලවරණයක් පැවැත්වීමට සිදුවන අතර එහිදී ඉරාන්ට ඉවතට වීසි වීමට සිදුවනු නියත බවත් සඳහන්.
ඒ අනුව, සජබ සමග දේශපාලන අනාගතයත් පරදුවට තබා ආණ්ඩුවට එකතුවුණු ඉරාන් වික්‍රමරත්න මහතාට බස්නාහිර පළාත් ආණ්ඩුකාර ධුරය ලබාදිය යුතු යැයි ආණ්ඩු පක්ෂය තුළින්ම යෝජනාවක් ඉදිරිපත් වී ඇති බවයි ආරංචිමාර්ග සඳහන් කළේ.
