මාස දෙකකට වැඩි කාලයක් තිස්සේ වසාදමා තිබූ සපුගස්කන්ද තෙල් පිරිපහදුවේ කටයුතු අද ආරම්භ වේ. තෙල් පිරිපහදුව සඳහා අවශ්‍ය බොරතෙල් තොග ලැබුණේ මාස දෙකකට වැඩි කාලයකට පසුවයි.
තෙල් පිරිපහදුවේ කටයුතු අද ආරම්භ වුවද එය නිසිපරිදි සිදුකළ හැකිද යන්න සැකසහිත වී තිබෙනවා.
මෙතෙක් කල් ඉරාන සහ ඕමාන් බොරතෙල්, තෙල් පිරිපහදුව සඳහා භාවිතා කළ අතර මෙවර වෙනත් රටකින් ආනයනය කළ බොරතෙල්, ඉන්ධන පිරිපහදු කටයුතු සඳහා භාවිතා වේ. එසේ වෙනත් රටකින් ආනයනය කළ බොරතලේ භාවිතය හේතුවෙන් තෙල් පිරිපහදු කටයුතු නිසිපරිදි සිදුකළ හැකිද යන්න සැකසහිත වී තිබෙනවා.
බොරතෙල් ආනයනය අර්බුදයට යාම හේතුවෙන් මෙවර බොරතෙල් ආනයනය කර තිබෙන්නේ සයිබීරියාවෙනි. ඒ සඳහා ඇමරිකානු ඩොලර් මිලියන 75 ක් හෙවත් රුපියල් බිලියන 27 ක් වැයකර තිබෙනවා.
කෙසේ නමුත් විෂය බාර අමාත්‍ය කංචන විජේසේකර මහතා පවසන්නේ සයිබීරියානු බොරතෙල් ප්‍රභේදය තෙල් පිරිපහදුව සඳහා ගැලපෙන බවයි. කෙසේ නමුත් පෙට්‍රල් නිෂ්පාදනය සිදුකළ හැකිද යන්න තහවුරු කර ගැනීමට නම් මෙහෙයුම් ආරම්භ කිරීමට සිදුවන බවද ඇමතිවරයා පවසනවා.
තෙල් පිරිපහදුවේ කටයුතු ආරම්භ කිරීමත් සමග දිනකට බොරතෙල් මෙට්‍රික් ටොන් 3500 – 4000 අතර ප්‍රමාණයක් භාවිතා කිරීමට නියමිතය.
UN
