සටහන – රුවන් නෙළුගොල්ල
බැක්ටීරියා මඟින් ඇතිවන ආසාදනවලට භාවිත කරන මෙරපනම් නම් එන්නත ප්‍රමාණවත් පරිදි රෝහල් පද්ධතියේ සහ වෛද්‍ය සැපයුම් පද්ධතියේ තිබියදීත් හදිසි මිල දී ගැනීම් යටතේ එන්නත් කුප්පි 450,000ක් මිලදී ගැනීමට රු. තිස්හය කෝටි අසූනව ලක්ෂ පනස්පන්දහසක් වැය කර ඇති බවත් මෙම එන්නත් කුප්පියක් සාමාන්‍ය ඇනවුම යටතේ රු. 1075.68කට ලබා ගත හැකි වුවත් මිල දී ගෙන ඇත්තේ රු.1895.50ට බවත් විපක්ෂ නායක සජිත් ප්‍රේමදාස මහතා පවසයි.
ඒ වන විටත් අප රටේ එන්නත් කුප්පි 488,590ක් තිබී ඇති බවට විගණන වාර්තාවේ සඳහන් බවත් එවැනි තත්ත්වයක් මත හදීසි මිල දී ගැනීමක් සිදු කළේ ඇයි ද කියා ගැටලු සහගත බවත් ඒ නිසා මේ ගැන විධිමත් ප්‍රකාශයක් කර පැහැදිලි කිරීමක් කරන ලෙස විපක්ෂ නායකවරයා රජයෙන් ඉල්ලා සිටියේය.
මෙම සැපයුම්කරුවන් විසින් ජාතික ඖෂධ නියාමන අධිකාරියේ ලියාපදිංචි සහතිකය ලැබී ටික කාලයක් තුළ හදිසි මිලදී ගැනීම් හරහා මෙම වංචාව සිදු කර ඇති නිසා මේ සම්බන්ධ වාර්තාවක් ලබා දෙන ලෙසත් ඒ මහතා වැඩිදුරටත් ඉල්ලා සිටියේය.
විපක්ෂ නායක සජිත් ප්‍රේමදාස මහතා මේ බව පැවසුවේ අද (07) පාර්ලිමේන්තුව අමතමිනි.
