සටහන – රෂිකා හෙන්නායක ජුනි 24, කොළඹ (LNW):
හංවැල්ල ජල්තර ප්‍රදේශයේදී 16 හැවිරිදි ශිෂ්‍යාවක් සමූහ දූෂණයට ලක්කළ බව කියන සිද්ධිය සම්බන්ධයෙන් චෝදනා ලැබ සිටින සැකකරුවන් අද (24) දින යළිත් හෝමාගම අධිකරණයට ඉදිරිපත් කරනු ලැබ ඇත.
අත්අඩංගුවට ගෙන සිටින ඇයගේ පෙම්වතා බව කියන පුද්ගලයා ඇතුළු 08 දෙනා මේ මස 28වැනිදා දක්වා රක්ෂිත බන්ධනාගාර ගත කරන ලෙස එහිදී වැඩබලන මහේස්ත්‍රාත් පද්මසිරි ජයවර්ධන මහතා නියෝග කළ බව සඳහන් වේ.
අද (24) දින පැවැත්වීමට නියමිතව තිබූ හදුනා ගැනීමේ පෙරෙට්ටුව, අතවරයට පත් දැරිය තවමත් රෝහල් ගතව ප්‍රතිකාර ලබන බැවින් කල් තබා තිබෙන බවද පැවසේ.
ඒ අනුව ඊළඟ නඩු දිනයේදී පළමු සහ තුන්වන සැකකරුවන් දෙදෙනා හැර, අනෙක් සැකකරුවන් හය දෙනා හදුනා ගැනීමේ පෙරෙට්ටුවක් සදහා ඉදිරිපත් කරන ලෙස මෙහිදී නියෝග කර ඇත.
හංවැල්ල පොලීසිය මගින් සැකකරුවන්ට දූෂණය සිදු කිරීම, බලහත්කාරයෙන් රඳවා ගැනීම, පැහැරගෙන යාම සහ නීති විරෝධී රැස්වීමක සාමාජිකයන් වීම යන කරුණු 04ක් යටතේ චෝදනා ගොනුකර තිබෙන බව සඳහන් වේ.
