ළමා පත්තරයක් තුළට වී
ස්පර්ශක බිඳී තිබුණු
සමනලයෙක් බලා සිටී
උට රෝස මලට යන පාර සොයා දෙන තුරු මා
තුඩවල් මාරු කරනා පැන්සලේ තුඩ තියා
පාරෙන් ඇතුල් පැත්තේ
මිනිරන් රේඛාවක් ඇඳලා
හමා එන මල් පුසුඹ ඔස්සේ
උට රෝස මලට යන පාර සොයාදිය යුතුය මා
වහ වහා
මුද්‍රණාලයේදී
මුද්‍රණය වන අතරවාරයේදී විය හැකිය
උගේ ස්පර්ශක යුගල බිඳුණේ
ඇතැම්විට
පත්තර මිටි බඳිද්දීද විය හැකිය
උගේ ස්පර්ශක යුගල බිඳුණේ
ටවුමේදී
මා විසින් පත්තරය දෙකට නවා
බෑගය තුළට දමාගත් මොහොතේදී විය නොහැකිද
උගේ ස්පර්ශක යුගල බිඳුණේ
මා මෙසේ කල්පනා කරමින් සිටින අතර
වෙහෙසට පත් සමනලයා
පත්තර පිටුව හැරදා
වෙනත් ළමයෙක් කරා
පියාඹා ගොස් තිබිණි
රෝස මලට යන පාරේ දැන් සිටින්නේ මා පමණි …!
~ රුවන් බන්දුජීව
