කොළඹ LNW:සිවනේසතුරෙයි චන්ද්‍රකාන්තන් හෙවත් පිල්ලෙයාන් පාස්කු ප්‍රහාරය සම්බන්ධයෙන් පූර්ව දැනුවත්භාවයක සිට ඇතැයි අද (09) පාර්ලිමේන්තුවේදී මහජන ආරක්ෂක අමාත්‍ය ආනන්ද විජේපාල මහතා අනාවරණය කළේය.
මඩකලපුව හිටපු මන්ත්‍රීවරයෙකු වන ජෝශප් පරරාජසිංහම් මහතාගේ ඝාතනය සම්බන්ධයෙන් ඒ වන විට ඔහු මඩකලපුව බන්ධනාගාර ගතව සිටියද පාස්කු ප්‍රහාරය සම්බන්ධයෙන් දැන සිට ඇති බවට මේ වන විට සිදුකර තිබෙන විමර්ශන මඟින් අනාවරණය වී ඇති බවයි විජේපාල මහතා සඳහන් කළේ.
ඒ වන විට යුද හමුදා බුද්ධි අංශ සාමාජිකයින් පිරිසක්ද පිල්ලෙයාන් සමඟ බන්ධනාගාර ගතව සිට ඇති අතර ඔවුන් පිල්ලෙයාන් සමඟ සමීප සබඳතා පවත්වා ඇති බවද මේ වන විට අනාවරණය වී තිබේ.
එම තත්ත්වයන් සම්බන්ධයෙන් තවදුරටත් විමර්ශනය කරගෙන යන අතර බොහෝ සංවේදී කාරණා හෙළිදරව් වී ඇති නමුත් ඒවා මේ මොහොතේ පාර්ලිමේන්තුවට ඉදිරිපත් කළ නොහැකි බවද අමාත්‍යවරයා ප්‍රකාශ කරන ලදී.
ආශිකා බ්‍රාහ්මණ
