සටහන: සශිකලා මධුෂාණි
ජූලි මස 18:ලෝකය(අවුට්බවුන්ඩ් ටුඩේ): බ්‍රසීල පාපන්දු පුරාවෘත්තයක් වන පේලේ 1958 FIFA ලෝක කුසලාන අවසන් තරගයේදී පැළඳ සිටි ජර්සිය වෙන්දේසියකදී ඇමෙරිකානු ඩොලර් මිලියන 4.9කට (රුපියල් බිලියන 1.6කට අධික වටිනාකමක්) අලෙවි වී තිබේ.
මෙම ජර්සිය අලෙවි කර ඇත්තේ Sotheby’s වෙන්දේසි ආයතනය විසින් වන අතර, එය පේලේට අදාළ මෙතෙක් වාර්තා වූ ඉහළම වටිනාකමක් සහිත ක්‍රීඩා සිහිවටනය බවට පත්ව තිබේ. කෙසේ වෙතත්, ක්‍රීඩා ලෝකයේ වෙන්දේසියක අලෙවි වූ සියලුම සිහිවටන අතරින් මෙය තවමත් ඉහළම වටිනාකමක් හිමි භාණ්ඩය නොවේ.
එම ජර්සිය පේලේ පැළඳ සිටියේ 1958 ලෝක කුසලාන අවසන් තරගයේදීය. එහිදී එවකට 17 හැවිරිදි වූ පේලේ ගෝල දෙකක් රැස් කරමින් ස්වීඩනයට එරෙහිව 5-2ක ජයක් ලබා දී බ්‍රසීලයට ඉතිහාසයේ පළමු ලෝක කුසලාන ශූරතාව දිනා දීමට නායකත්වය දුන්නේය.
