රෂිකා හෙන්නායක ජූලි 27, කොළඹ LNW :
ශ්‍රී ලංකාවේ ශ්‍රේෂ්ඨාධිකරණය සහ අභියාචනාධිකරණය ඇතුළු විවිධ මට්ටම්වල විනිසුරුවරුන්ගේ විශ්‍රාම ගැන්වීමේ වයස වසර දෙකකින් ඉහළ නැංවීමට අමාත්‍ය මණ්ඩල අනුමැතිය හිමිව තිබේ.
මෙම යෝජනාවට අනුව ශ්‍රේෂ්ඨාධිකරණ විනිසුරුවරුන්ගේ විශ්‍රාම වයස අවුරුදු 67 දක්වා ද, අභියාචනාධිකරණ විනිසුරුවරුන්ගේ වයස අවුරුදු 65 දක්වා ද දීර්ඝ කිරීමට නියමිතය.
මීට අමතරව මහාධිකරණ, දිසා සහ මහේස්ත්‍රාත් අධිකරණවල විනිසුරුවරුන් සඳහා ද මෙලෙස සේවා කාලය දීර්ඝ කිරීමට අදාළ ව්‍යවස්ථා සංශෝධන සිදු කෙරෙනු ඇත.
අදාළ පනත් කෙටුම්පත සකස් කිරීම සඳහා දැනටමත් නීති කෙටුම්පත් සම්පාදක වෙත උපදෙස් ලබා දී ඇති බව සඳහන් වේ.
මෙම නව ප්‍රතිසංස්කරණය මඟින් මෙරට අධිකරණ පද්ධතියේ ජ්‍යෙෂ්ඨ විනිසුරුවරුන්ට වැඩි කාලයක් සේවය කිරීමට අවස්ථාව සැලසෙයි.
මෙම ක්‍රියාවලිය සම්පූර්ණ කිරීම සඳහා ඉදිරියේදී නීතිපතිවරයාගේ අනුමැතිය සහ පාර්ලිමේන්තු ක්‍රියා පටිපාටීන් අනුගමනය කිරීමට නියමිතය.
