කොළඹ LNW:වාමාංශික දේශපාලන කඳවුර ආරක්ෂා කිරීම අතහැරිය නොහැකි වගකීමක් වන හෙයින් ශ්‍රී ලංකා පොදුජන පෙරමුණ ගොඩනැගීමට හේතු පාදක වූ දේශපාලන කඳවුර වෙනුවෙන් පෙනී සිටිය යුතුය යන මතයේ සිට රනිල් වික්‍රමසිංහ ජනාධිපතිවරයාට සහය නොදැක්වීමට පක්ෂයේ දේශපාලන මණ්ඩලය තීරණය කළ බව එහි ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ මහතා පැවසුවේය.
එමෙන්ම ජන්ද පත්‍රිකාවේ පොහොට්ටුවේ සලකුණ තිබිය යුතු අතර පක්ෂයේ අපේක්ෂකයෙක් සිටිය යුතු බවට වන තීන්දුවත් ඊට බලපෑ බවයි මන්ත්‍රීවරයා සඳහන් කළේ.
ඒ අනුව දැනට යෝජනා වී තිබෙන අපේක්ෂකයින් සමඟ සාකච්ජා කර ජනාධිපතිවරණ අපේක්ෂකයා ගැන අවසන් තීන්දුවකට පැමිණෙනු ඇතැයිද ඔහු ප්‍රකාශ කළේය.
එමෙන්ම එක්ව කටයුතු කිරීම වෙනුවෙන් වමේ ප්‍රගතිශීලි කදවුරට තමන් යළිත් ආරාධනා කරන බවත් නාමල් රාජපක්ෂ මහතා තවදුරටත් සඳහන් කරන ලදී.
රටේ අවශ්‍යතාව වෙනුවෙන් 2022දී ගත් අසීරු දේශපාලන තීන්දුවත් සමඟ වාමාංශික දේශපාලන කඳවුර සමඟ යම් දුරස්ථභාවයක් ඇතිවුවද රටට ආදරය කරන සංස්කෘතියට ආදරය කරන දේශීය ආර්ථිකය ආරක්ෂා කරන ප්‍රතිපත්ති සමඟ ජයග්‍රහණය කළ හැකි අපේක්ෂකයෙක් සමඟ ඉදිරියට යා හැකි බවයි ඔහු වඩිදුරටත් අවධාරණය කළේ.
ආශිකා බ්‍රාහ්මණ
