සටහන – රුවන් නෙළුගොල්ල
පාර්ලිමේන්තු මන්ත්‍රී රෝහිත අබේගුණවර්ධන මහතාගේ දියණිය වන රොෂෙල් මෙලනි අබේගුණවර්ධන අද (ජුලි 30) උදෑසන නීතිඥවරයෙකුගේ මාර්ගයෙන් වලාන මධ්‍යම දූෂණ මර්දන ප්‍රහාරක ඒකකය වෙත භාරවී තිබේ.
ඒ, ව්‍යාජ දත්ත ඇතුළත්කොට ලියාපදිංචි කරන ලද සුඛෝපභෝගී ජීප් රථයක් සම්බන්ධයෙන් සිදුකෙරෙන විමර්ශනයකට අදාළව ය.
මෙම සිද්ධිය සම්බන්ධයෙන් ජුලි 19 වනදා පෙරවරුවේ සමගි ජනබලවේගයේ කළුතර දිස්ත්‍රික් පාර්ලිමේන්තු මන්ත්‍රී ජගත් විතාන මහතාගේ පුත්‍රයා වන රසික විතාන මහතාව අත් අඩංගුවට ගෙන තිබුණු අතර ඔහු එම ජීප් රථය මිලදී ගෙන තිබුණේ පාර්ලිමේන්තු මන්ත්‍රි රෝහිත අබේගුණවර්ධන මහතාගේ දියණිය වන රොෂෙල් මෙලනි අබේගුණවර්ධනගෙන් බවට ලද තොරතුරු අනුව ඇයව අත් අඩංගුවට ගැනීමට පොලීසිය ඇගේ නිවසට ගියත් ඇය නිවසේ නොසිටි බව පොලීසිය පැවසූ අතර මේ දක්වාම ඇයව සොයාගැනීමට හැකියාවක් පොලීසියට ලැබී නොතිබිණි.
