සටහන – රුවන් නෙළුගොල්ල
2015 ජනාධිපතිවරණය ආසන්නයේදී කහවත්තේ පැවති ජනාධිපති අපේක්ෂක මෛත්‍රිපාල සිරිසේන මහතාගේ ප්‍රචාරක රැලියකට වෙඩිතබා ශාන්ත දොඩම්ගොඩ නමැති අයෙකු ඝාතනය කිරීම සම්බන්ධයෙන් මරණීය දණ්ඩනය නියම වී සිටි හිටපු අමාත්‍ය ප්‍රේමලාල් ජයසේකර හෙවත් චොකා මල්ලී ඇතුළු තිදෙනෙකු නිදොස්කොට නිදහස් කරමින් අභියාචනාධිකරණය ලබාදුන් තීන්දුව බලරහිත කරන ලෙස ඉල්ලා ගොනුකර ඇති අභියාචනා පෙත්සමක් විභාගයට ගැනීමට ශ්‍රේෂ්ඨාධිකරණය අද (ජුලි 31) අවසර ලබාදී තිබේ.
ඒ, එම පෙත්සම ජනක් ද සිල්වා, ප්‍රියන්ත ප්‍රනාන්දු සහ සම්පත් අබේකෝන් යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් හමුවේ සලකා බැලූ අවස්ථාවේදී ය.
ඒ අනුව පෙත්සම විභාගය සඳහා 2026 පෙබරවාරි 13 වනදා කැඳවීමට නියම කෙරිණි.
සිද්ධියෙන් අගතියට පත් පාර්ශ්වය විසින් ගොනුකර ඇති අභියාචනා පෙත්සමෙහි දක්වා ඇත්තේ ප්‍රේමලාල් ජයසේකර ඇතුළු විත්තිකරුවන් නිදොස් කොට නිදහස් කරමින් අභියාචනාධිකරණය දුන් තීන්දුව නීතියට පටහැනි බවය. ඒ අනුව එම තීන්දුව බල රහිතකර විත්තිකරුවන්ට එරෙහිව මහාධිකරණය මගින් පනවන ලද මරණීය දණ්ඩනය යළි නියම කරන ලෙස පෙත්සම්කරුවන් ශ්‍රේෂ්ඨාධිකරණයෙන් ඉල්ලා ඇත.
