දහසින් බැඳි පියළි දිනපතා හොයන
රහසින්වත් පව් නම් නොකරන
අහසින්ම මෙලොවට බැස, පොලොවට ඉහළින්ම වෙසෙන
මාස්පඩිකාර ධනපති නෝනාවරුනි , මහතුනි
නුඹලාගේ අම්මලා මෙන්ම
හිරේ විලංගුවේ ගිය එකාගේ අම්මාත් ‘අම්මා’ ය !
මහර යමර ජරමර මැද
වල්ගා කොනින් දිය බිඳ බිඳ
අද්දා මුහුද සින්දන්නට
වෙර දරන, හඬන, වැළපෙන, බනින
දරු දුකින් පරළ වන අම්මා ය
වරද හෝ නිවැරදිව
ඔය ගුවන් තොටිල්ලෙන්
නුඹත් බිමහොත් දාක
දෑස් පල්ලා නුඹට දැකගන්න හැකිවෙනා
පෙරළිකාරිය මහර අම්මා ය ….
~ රුවන් නෙලූ
