රෂිකා හෙන්නායක අගෝස්තු 05, කොළඹ (LNW):
වී.එෆ්.එස් ග්ලෝබල් සමාගම හරහා ක්‍රියාත්මක වූ ක්‍රමවේදය සඳහා ශ්‍රේෂ්ඨාධිකරණය විසින් නිකුත් කරන ලද අතුරු තහනම් නියෝගයත් සමග ඉදිරියේදී වීසා නිකුත් කරන ආකාරය ගැන අධ්‍යයනය කරමින් සිටින බව ආගමන විගමන පාලක ජනරාල් හර්ෂ ඉලුක්පිටිය පවසයි.
අද (05) දින මෙම අතුරු තනහම් නියෝගය තමාට ලැබෙන බවත්, එය අධ්‍යයනය කර ක්‍රමවේදයක් සකසන බවත් පාලක ජනරාල්වරයා පවසන අතර, ශ්‍රී ලංකාවට පැමිණෙන විදේශිකයන්ට කාණ්ඩ 17ක් යටතේ මාර්ගගත ක්‍රමයට වීසා නිකුත් කිරීමට ආගමන විගමන දෙපාර්තමේන්තුව පියවර ගෙන තිබුණේ පසුගිය අප්‍රේල් මාසයේ සිටය. ඒ වී.එෆ්.එස් ග්ලෝබල් සමාගම මගිනි.
මෙම ක්‍රමවේදය ජාතික ආරක්ෂාවට තර්ජනයක් වන බවට කරුණු දක්වමින් ඉදිරිපත්වුණු පෙත්සම් 8ක් සැලකිල්ලට ගනිමින් පසුගිය සිකුරාදා ශ්‍රේෂ්ඨාධිකරණය මෙම අතුරු තහනම් නියෝගය නිකුත් කළ අතර, එබැවින් එතෙර සිට මෙරටට පැමිණෙන සංචාරකයන්ට මෙරටට පැමිණ ගුවන් තොටුපළින් වීසා ලබාගැනීමට (on arrival) සිදුව ඇති බව පැවසේ.
