සටහන – රුවන් නෙළුගොල්ල
ජනාධිපතිවරණ වියදම් නියාමන පනතට අනුව එක් ඡන්ද දායකයකු වෙනුවෙන් සිදුකිරීමට බලාපොරොත්තුවන වියදම සම්බන්ධයෙන් අපේක්ෂකයින්ගෙන් විමසා ඇති බවත් එහිදී ඔවුන් ශත 50 සිට රුපියල් 1000 දක්වා යෝජනා ඉදිරිපත් කර ඇති බවත් මැතිවරණ කොමසාරිස් ජනරාල් සමන් ශ්‍රී රත්නායක මහතා පවසයි.
“අදාළ අපේක්ෂකයින්ගෙන් ඔවුන් වියදම් කිරීමට බලාපොරොත්තු වන මුදල කීයක්ද කියලා ලිඛිතව ලබාගනු ලැබුවා. ඒ අනුව එක් ඡන්ද දායකයෙකුට ශත 50 සිට රුපියල් 1000 දක්වා මුදල් යෝජනා වුණා. මෙහි පනතට අනුකූලවම තියෙන කාරණාව තමයි අපේක්ෂකයින්ගෙන් විමසා කොමිෂන් සභාව මේ තීරණය කළ යුතුයි කියන එක. ඒ අනුව කොමිෂන් සභාව රැස්වෙලා ඒ සම්බන්ධයෙන් අදාළ තීරණය ගැසට් මගින් ප්‍රකාශයට පත්කිරීමට නියමිතයි”
“2023 අංක 03 දරණ මැතිවරණ වියදම් නියාමනය කිරීමේ පනත ක්‍රියාත්මක කිරීමට අවශ්‍ය මූලික කටයුතු සිදුකරලා තියෙනවා. ඒ අනුව අවසරලත් මුදල තීරණය කරනවා කොමිෂන් සභාව විසින්. ඒ අවසරලත් මුදල තීරණය කළාට පස්සෙ ඒ සීමාව තුළ තමයි අපේක්ෂකයෙකුට වියදම් කරන්න හැකියාව ලැබෙන්නෙ. මැතිවරණය අවසන් වෙලා දින 21ක් ඇතුළතදී අපේක්ෂකයෙක් ඔවුන්ගෙ ආදායම් සහ වියදම් වාර්තාව ලබාදෙන්න ඕනෙ මැතිවරණ කොමිෂන් සභාවට. ඉන්පස්සෙ මෙය දින 10ක කාලයක් ප්‍රදර්ශනය කරනු ලබනවා මැතිවරණ කාර්යාලයේ. යම් ලෙසකින් මේ වියදම් පිළිබඳව වැරදි නැතහොත් සීමාව ඉක්මවීම වැනි කාරණා තුල අධිකරණ තීන්දුවකින් ධුරය අහෝසි කිරීමට සිදුවෙනවා”
අදාළ ගැසට් නිවේදනය ලබන සතියේදී නිකුත් කෙරෙනු ඇති බවයි මැතිවරණ කොමසාරිස් ජනරාල්වරයා සඳහන් කළේ.
